ಮಲೇಷಿಯಾ:ಐವರು ಭಾರತೀಯರ ಬಂಧನ ಕುಲಾಲುಂಪುರ್, ಗುರುವಾರ, 13 ಡಿಸೆಂಬರ್ 2007( 16:08 IST )

ದೇಶದ ಭದ್ರತೆ ಕಾಯ್ದೆ ಅನ್ವಯ ಹಿಂದೂ ಸಂಘಟನೆಯ ಐವರು ಭಾರತೀಯರನ್ನು ಯಾವುದೇ ವಿಚಾರಣೆ ಇಲ್ಲದೇ ಅನಿರ್ಧಿಷ್ಟ ಕಾಲದವರೆಗೆ ಬಂಧಿಸಲಾಗಿದೆ ಎಂದು ವಕೀಲ ಸುರೇಂದ್ರನ್ ತಿಳಿಸಿದ್ದಾರೆ. ಬಂಧಿತರು ಹಿಂದೂ ಸಂಘಟನೆಯ ಪ್ರಮುಖ ನಾಯಕರುಗಳಾಗಿದ್ದು, ನವೆಂಬರ್ 25 ರಂದು ನಡೆದ ನಿಷೇಧಿತ ಮೆರವಣಿಗೆಯಲ್ಲಿ ಸಕ್ರಿಯವಾಗಿ ಪಾಲ್ಗೊಂಡಿದ್ದರಿಂದ ಅವರನ್ನು ಬಂಧಿಸಲಾಗಿದೆ ಎಂದು ಹೇಳಲಾಗಿದೆ. ಅಪರೂಪಕ್ಕೆ ರಾಷ್ಟ್ರೀಯ ಭದ್ರತೆಗೆ ಧಕ್ಕೆ ಬಂದಾಗ ಮಾತ್ರ ಉಪಯೋಗಿಸುವ ಅಂತರಿಕ ಭದ್ರತಾ ಕಾಯ್ದೆ (ಐಎಸ್‌ಎ) ಕಾನೂನಿನ ಅಡಿಯಲ್ಲಿ ಐವರು ಭಾರತೀಯರನ್ನು ಬಂಧಿಸಲಾಗಿದೆ ಎಂದು ಸುರೇಂದ್ರನ್ ಹೇಳಿದ್ದಾರೆ. ಹಿಂದೂ ಸಂಘಟನೆಗಳು ಕಳೆದ ತಿಂಗಳು ನಡೆಸಿದ ಪ್ರತಿಭಟನಾ ಮೆರವಣಿಗೆಯಲ್ಲಿ ಸಾವಿರಾರು ಸಂಖ್ಯೆಯಲ್ಲಿ ಸೇರಿದ್ದ ಭಾರತೀಯರು ಸರಕಾರದ ನಿದ್ದೆಗೆಡಿಸಿದ್ದರು. ರಸ್ತೆ ಪ್ರತಿಭಟನೆಗಳು ಹಿಂಸಾಚಾರಕ್ಕೆ ಎಡೆಮಾಡಿಕೊಡುವುದರಿಂದ ಸರಕಾರ ಇದನ್ನು ಸಹಿಸಲು ಸಾಧ್ಯವಿಲ್ಲ. ಅಗತ್ಯ ಬಿದ್ದರೆ ಅಂತರಿಕ ಭದ್ರತಾ ಕಾಯ್ದೆಯನ್ನು ಜಾರಿಗೊಳಿಸಲಾಗುವುದು ಎಂದು ಪ್ರಧಾನಿ ಅಬ್ದುಲ್ಲಾ ಅಹಮದ್ ಹೇಳಿದ್ದಾರೆ.