ಇನ್ನಾರು ಮಾಸಗಳಲ್ಲಿ ಎಲ್‌ಟಿಟಿಇ ನಿರ್ನಾಮ ಕೊಲಂಬೊ, ಸೋಮವಾರ, 31 ಡಿಸೆಂಬರ್ 2007( 09:27 IST )

ದಶಕಗಳ ಕಾಲ ಶ್ರೀಲಂಕಾವನ್ನು ಕಾಡಿದ ಜಗತ್ತಿನ ಶಕ್ತಿಶಾಲಿ ಉಗ್ರಗಾಮಿ ಸಂಘಟನೆಗಳಲ್ಲಿ ಒಂದಾದ ಶ್ರೀಲಂಕಾದ ಎಲ್‌ಟಿಟಿಇ ಪಡೆಯನ್ನು ಇನ್ನಾರು ಮಾಸಗಳಲ್ಲೇ ನಿರ್ನಾಮ ಮಾಡುವುದಾಗಿ ಶ್ರೀಲಂಕಾ ಸೇನಾ ಮುಖ್ಯಸ್ಥ ಶರತ್ ಪೊನ್ಸೇಕಾ ತಿಳಿಸಿದ್ದಾರೆ. ಎಲ್‌ಟಿಟಿಇ ಉಗ್ರರ ಬಿಗಿ ಹಿಡಿತವಿರುವ ಉತ್ತರ ವನ್ನಾ ಪ್ರದೇಶಕ್ಕೆ ಬೇಟಿ ನೀಡಿ ಸೇನಾ ಕಾರ್ಯಾಚರಣೆಯ ಕಾರ್ಯ ಪರಿಶೀಲಿಸಿದ ನಂತರ ಅವರು ಈ ಹೇಳಿಕೆ ನೀಡಿದ್ದು ಎಲ್‌ಟಿಟಿಇ ಸಂಘಟನೆಗೆ ಎಚ್ಚರಿಕೆಯ ಗಂಟೆಯಾಗಿದೆ ಎಂದಿದ್ದಾರೆ. ಇನ್ನಾರು ತಿಂಗಳುಗಳ ನಂತರ ಎಲ್‌ಟಿಟಿಇ ಸಂಘಟನೆಯು ಇರುವುದಿಲ್ಲ ಮತ್ತು ಅದರ ಮುಖ್ಯಸ್ಥನು ಕೂಡಾ ಬದುಕಿರುವುದಿಲ್ಲ ಎನ್ನುವ ಹೇಳಿಕೆ ನೀಡುವ ಮೂಲಕ, ಲಂಕನ್ ಸೇನೆ ಈ ಪ್ರದೇಶದ ಮೇಲೆ ಸಾಧಿಸಿದ ಪ್ರಾಬಲ್ಯವನ್ನು ಒತ್ತಿ ಹೇಳಿದರು. ಕಳೆದ ಆರು ತಿಂಗಳುಗಳುಗಳಿಂದ ಲಂಕಾದಲ್ಲಿ ತಮಿಳು ಉಗ್ರರು ಮತ್ತು ಸೇನಾಪಡೆ ಮಧ್ಯೆ ಭಾರಿ ಪ್ರಮಾಣದಲ್ಲಿ ಕದನಗಳು ಜರುಗಿದ್ದು, ಲಂಕನ್ ಸೇನೆ ಉಗ್ರರ ಪಡೆಯನ್ನು ಹಂತ ಹಂತವಾಗಿ ಹತ್ತಿಕ್ಕುವಲ್ಲಿ ಸಫಲವಾಗಿದೆ. "ಎಲ್‌ಟಿಟಿಇ ಪಡೆಯಲ್ಲಿ ಇದೀಗ ಕೇವಲ 3 ಸಾವಿರ ಉಗ್ರರು ಮಾತ್ರ ಇದ್ದಾರೆ. ನಮ್ಮ ದಾಳಿಯಿಂದಾಗಿ ಅವರೆಲ್ಲರು ತಮ್ಮ ಪ್ರಾಣ ಉಳಿಸಿಕೊಳ್ಳುವುದು ತುಂಬಾ ದುಸ್ತರವಾಗಿದೆ ಮತ್ತು ಈ ಸಂಘಟನೆಯ ಪರಮೋಚ್ಛ ನಾಯಕ ವೆಲುಪಿಳ್ಳೆ ಪ್ರಭಾಕರನ್ ಅವರ ಮೇಲೆ ವಾಯು ದಾಳಿ ನಡೆಸಲು ವಾಯುಸೇನೆ ಸಿದ್ಧತೆಗಳನ್ನು ನಡೆಸಿದ್ದರಿಂದ ಅವರು ಇನ್ನಾರು ತಿಂಗಳಲ್ಲಿ ನಿರ್ನಾಮವಾಗಲಿದ್ದಾರೆ" ಎಂದು ಸೇನಾಧ್ಯಕ್ಷರು ಹೇಳಿದರು.