ಬಗ್ದಾದ್ ಸಮೀಪ ಸಾಮೂಹಿಕ ಗೋರಿ ಪತ್ತೆ ಬಗ್ದಾದ್ (ಏಜೆನ್ಸಿ), ಬುಧವಾರ, 6 ಫೆಬ್ರವರಿ 2008( 15:15 IST )

ಬಗ್ದಾದಿನ ವಾಯವ್ಯ ದಿಕ್ಕಿನಲ್ಲಿರುವ ಸಾಮೂಹಿಕ ಗೋರಿಯಲ್ಲಿ ಸುಮಾರು 50 ದೇಹಗಳು ಪತ್ತೆಯಾಗಿವೆ ಎಂದು ಇರಾಕಿ ಅಧಿಕಾರಿಗಳು ಹೇಳಿದ್ದಾರೆ. ತರ್ತಾರ್ ಸರೋವರದ ಸಮೀಪದ ಸಮರ್ರದ 25 ಕಿಲೋ ಮೀಟರ್ ಪಶ್ಚಿಮಕ್ಕಿರುವ ಜಝೀರ ಎಂಬ ಗ್ರಾಮದಲ್ಲಿ ಅಮೆರಿಕ ಬೆಂಬಲಿತ ಸುನ್ನಿ ಬುಡಕಟ್ಟು ಪಡೆಯು ಗಸ್ತು ತಿರುಗುತ್ತಿದ್ದ ವೇಳೆ ಈ ಗೋರಿ ಪತ್ತೆಯಾಗಿದೆ ಎಂದು ಕರ್ನೆಲ್ ಮಾಝಿನ್ ಯೂನಿಸ್ ಹುಸೈನ್ ಹೇಳಿದ್ದಾರೆ. ಹುಸೈನ್ ಅವರು ಅಮೆರಿಕ ಪಡೆಗಳಿಗಾಗಿ ಕಾರ್ಯನಿರ್ವಹಿಸುವ ಸ್ಥಳೀಯ ವ್ಯಕ್ತಿಗಳನ್ನೊಳಗೊಂಡ ಪಡೆಯ ಕಮಾಂಡರ್ ಆಗಿದ್ದಾರೆ. ಕೆಲವು ಮೃತದೇಹಗಳು ಕೊಳೆತ ಸ್ಥಿತಿಯಲ್ಲಿದ್ದು, ತಿಂಗಳ ಹಿಂದೆ ಹೂಳಿರಬಹುದೆಂದು ಸಂಶಯಿಸಲಾಗಿದೆ. ಮತ್ತೆ ಕೆಲವು ಬಲಿಪಶುಗಳು ಇತ್ತೀಚೆಗೆ ಸಾವಿಗೀಡಾಗಿರುವಂತೆ ಕಂಡು ಬಂದಿದೆ ಎಂದು ಸ್ಥಳಕ್ಕೆ ಭೇಟಿ ನೀಡಿರುವ ಸಮರ್ರ ಪೊಲೀಸ್ ಅಧಿಕಾರಿ ಹೇಳಿದ್ದಾರೆ. ಕಳೆದ ಕೆಲವು ತಿಂಗಳಲ್ಲಿ ಸುಮಾರು 200ಕ್ಕೂ ಅಧಿಕ ಮೃತ ದೇಹಗಳು ಸಾಮೂಹಿಕ ಗೋರಿಗಳಲ್ಲಿ ತರ್ತಾರ್ ಸರೋವರದ ಸುತ್ತುಮುತ್ತ ಪತ್ತೆಯಾಗಿದೆ.