ಟೆಹ್ರಾನ್ ತನ್ನ ಅಣುಯೋಜನೆಯನ್ನು ಮುಂದುವರಿಸಿರುವ ಹಿನ್ನೆಲೆಯಲ್ಲಿ ಹೊಸ ದಿಗ್ಬಂಧನಗಳನ್ನು ಹೇರಬೇಕು ಎಂದು ಪಾಶ್ಚಾತ್ಯ ಶಕ್ತಿಗಳು ಒತ್ತಾಯಿಸಿವೆ. ಏತನ್ಮಧ್ಯೆ, ಹೊಸ ದಿಗ್ಬಂಧನ ಹೇರಿದಲ್ಲಿ ತೈಲಬೆಲೆ ಏರಿಕೆಯನ್ನು ಅನುಭವಿಸಬೇಕಾದೀತು ಎಂದು ಇರಾನ್ ಎಚ್ಚರಿಸಿದೆ.
ವಿಶ್ವಸಂಸ್ಥೆಯ ಭದ್ರತಾ ಮಂಡಳಿಯ ಖಾಯಂ ಸದಸ್ಯತ್ವ ಹೊಂದಿರುವ ರಾಷ್ಟ್ರಗಳಾದ ಚೀನ, ರಷ್ಯಾ, ಅಮೆರಿಕ, ಬ್ರಿಟನ್ ಹಾಗೂ ಫ್ರಾನ್ಸಿನ ಹಿರಿಯ ರಾಜತಾಂತ್ರಿಕರು ಕಳೆದ ರಾತ್ರಿ ವಾಶಿಂಗ್ಟನ್‌ನಲ್ಲಿ ಸಭೆ ನಡೆಸಿ ಇರಾನ್ ವಿರುದ್ಧದ ಕಾರ್ಯತಂತ್ರದ ಕುರಿತು ಚರ್ಚಿಸಿದರು.
ನ್ಯೂಯಾರ್ಕಿನಲ್ಲಿ ಚರ್ಚಿಸಲಾಗುತ್ತಿರುವ ದಿಗ್ಬಂಧನಗಳ ಕರಡು ಶಿಫಾರಸಿಗೆ ಶೀಘ್ರವೇ ಮತಚಲಾಯಿಸುವ ನಿರೀಕ್ಷೆಯನ್ನು ನಾವು ಮುಂದುವರಿಸುತ್ತೇವೆ ಎಂದು ವಿದೇಶಾಂಗ ಇಲಾಖೆಯ ವಕ್ತಾರ ಟಾಮ್ ಕ್ಯಾಸೆ ಸಭೆಯ ನಂತರ ತಿಳಿಸಿದರು.
ಇರಾನ್ ಅಣ್ವಸ್ತ್ರಗಳನ್ನು ತಯಾರಿಸುತ್ತಿದೆ ಎಂದು ಆರೋಪಿಸುತ್ತಿರುವ ಅಮೆರಿಕ, ಬ್ರಿಟನ್ ಮತ್ತು ಫ್ರಾನ್ಸ್ ದಿಗ್ಬಂಧನ ಹೇರುವಂತೆ ಒತ್ತಾಯಿಸುತ್ತಿದ್ದರೆ, ರಷ್ಯಾ ಮತ್ತು ಚೀನ ದಿಗ್ಬಂಧನ ಹೇರುವಿಕೆಯನ್ನು ವಿರೋಧಿಸುತ್ತಿವೆ.
ಪಾಶ್ಚಾತ್ಯ ರಾಷ್ಟ್ರಗಳ ಆರೋಪವನ್ನು ತಳ್ಳಿಹಾಕಿರುವ ಇರಾನ್, ಅಣ್ವಸ್ತ್ರ ತಯಾರಿ ಕಾರ್ಯವನ್ನು ಅಲ್ಲಗಳೆದಿದೆ. ತನ್ನ ಅಣುಯೋಜನೆಯು ಶಾಂತಿಯ ಉದ್ದೇಶಗಳಿಗೆ ಎಂದು ಹೇಳುತ್ತಲೇ ಬಂದಿದ್ದು, ಅಮೆರಿಕದ ಬೆದರಿಕೆಗಳಿಗೆ ಸೊಪ್ಪು ಹಾಕುತ್ತಿಲ್ಲ.
|
ಸುದ್ದಿ ಜಗತ್ತು > ಸುದ್ದಿಗಳು > ಅಂತಾರಾಷ್ಟ್ರೀಯ
ಸಲಹೆ/ಪ್ರತಿಕ್ರಿಯೆ
ಮಿತ್ರನಿಗೆ ಕಳುಹಿಸಿ
ಈ ಪುಟ ಮುದ್ರಿಸಿ