ಶ್ರೀಲಂಕಾ: ಘರ್ಷಣೆಯಲ್ಲಿ 32 ಮಂದಿ ಸಾವು ಕೊಲಂಬೊ, ಸೋಮವಾರ, 10 ಮಾರ್ಚ್ 2008( 13:32 IST )

ಶ್ರೀಲಂಕಾದ ಉತ್ತರ ಭಾಗದಲ್ಲಿ ಸೇನಾಪಡೆಗಳ ಹಾಗೂ ತಮಿಳು ಉಗ್ರರ ಘರ್ಷಣೆಯಲ್ಲಿ 32 ಮಂದಿ ಸಾವನ್ನಪ್ಪಿದ್ದಾರೆ ಎಂದು ಸೇನಾವಕ್ತಾರರು ತಿಳಿಸಿದ್ದಾರೆ. ಜಾಫ್ನಾದ ಆಗ್ನೆಯ ಭಾಗದಲ್ಲಿರುವ ಮನ್ನಾರ್ ಪ್ರದೇಶದಲ್ಲಿರುವ ಉಗ್ರರ ಮೇಲೆ ಭೂದಾಳಿ ಹಾಗೂ ವಾಯು ದಾಳಿ ನಡೆಸಿದ ಸೇನಾಪಡೆಗಳು 10 ಮಂದಿ ಉಗ್ರರನ್ನು ಕೊಂದು ಹಾಕಿವೆ. ಘರ್ಷಣೆಯಲ್ಲಿ ಮೂವರು ಸೈನಿಕರು ಹತರಾಗಿದ್ದು 10 ಮಂದಿಗೆ ಗಾಯಗಳಾಗಿವೆ ಎಂದು ರಕ್ಷಣಾ ಸಚಿವಾಲಯದ ವಕ್ತಾರರು ತಿಳಿಸಿದ್ದಾರೆ. ವಾಯುನಿಯಾ ಪ್ರಾಂತ್ಯದ ಕರಂಪೆಕುಲಂ ಪ್ರದೇಶದಲ್ಲಿ ನಡೆದ ಪ್ರತ್ಯೇಕ ಕಾರ್ಯಾಚರಣೆಯಲ್ಲಿ ಇಬ್ಬರು ಉಗ್ರರು ಸೇರಿದಂತೆ ಒಬ್ಬ ಸೈನಿಕನು ಹತರಾಗಿದ್ದಾರೆ ಎಂದು ಸೇನಾಮೂಲಗಳು ತಿಳಿಸಿವೆ. ಯಾವುನಿಯಾದ ಪಲೈಮೊಡ್ಡೈ ಪ್ರದೇಶದ ಮೇಲೆ ದಾಳಿ ನಡೆಸಿದ ಸೇನಾಪಡೆಗಳು ನಾಲ್ವರು ಉಗ್ರರನ್ನು ಕೊಂದು ಹಾಕಿವೆ ಪೆರಿಯಾವಲಾನ್‌ನ ಕಡ್ಡುಕುಲಂ ಪ್ರದೇಶದಲ್ಲಿ ಒಬ್ಬ ಉಗ್ರ ಹತನಾಗಿದ್ದಾನೆ ಎಂದು ಸೇನಾಪಡೆಗಳ ವಕ್ತಾರರು ತಿಳಿಸಿದ್ದಾರೆ.