ಪಾಕ್ ಗಡಿಯಲ್ಲಿ 40 ಪ್ರಯಾಣಿಕರ ಅಪಹರಣ ಇಸ್ಲಾಮಾಬಾದ್, ಬುಧವಾರ, 26 ಮಾರ್ಚ್ 2008( 16:41 IST )

ಅಫಘಾನಿಸ್ತಾನದ ಕಾರಾಗೃಹದಲ್ಲಿರುವ ಕೈದಿಗಳನ್ನು ಬಿಡುಗಡೆ ಮಾಡುವಂತೆ ಒತ್ತಾಯಿಸಿ ಪಾಕ್ -ಅಫಘಾನ್ ಗಡಿ ಭಾಗದಲ್ಲಿರುವ ಬುಡಕಟ್ಟು ಪ್ರದೇಶದಲ್ಲಿ 40 ಮಂದಿ ಪ್ರಯಾಣಿಕರನ್ನು ಶಸ್ತ್ರಾಸ್ತ್ರ ಹೊಂದಿದ ಬುಡಕಟ್ಟು ಜನಾಂಗದ ವ್ಯಕ್ತಿಗಳು ಅಪಹರಿಸಿದ್ದಾರೆ ಎಂದು ಪಾಕ್ ಮೂಲಗಳು ತಿಳಿಸಿವೆ. ಪಾಕಿಸ್ತಾನ-ಅಫಗಾನಿಸ್ಥಾನ ಸ್ನೇಹಿ ಬಸ್‌‌ನ್ನು ಬುಡಕಟ್ಟು ಉಗ್ರರು ಅನಾಮಧೇಯ ಸ್ಥಳಕ್ಕೆ ತೆಗೆದುಕೊಂಡು ಹೋಗಿದ್ದು, ಪ್ರಯಾಣಿಕರ ಬದಲಿಗೆ ಕಾರಾಗೃಹದಲ್ಲಿರುವ ಬಂಧಿತರನ್ನು ಬಿಡುಗಡೆ ಮಾಡುವಂತೆ ಒತ್ತಾಯಿಸಿದ್ದಾರೆ ಎಂದು ಪೊಲೀಸ್ ಅಧಿಕಾರಿಗಳು ತಿಳಿಸಿದ್ದಾರೆ. ಅಪಹರಣಕಾರರೊಂದಿಗೆ ಸರಕಾರ ಸಂಧಾನ ನಡೆಸುತ್ತಿದ್ದು ಪ್ರಯಾಣಿಕರನ್ನು ಸುರಕ್ಷಿತವಾಗಿ ಬಿಡುಗಡೆ ಮಾಡುವಂತೆ ಮನವಿ ಮಾಡಲಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಪಾಕಿಸ್ತಾನದ ಅಧಿಕಾರಿಗಳು ಅಫಘಾನಿಸ್ತಾನದ ಅಧಿಕಾರಿಗಳೊಂದಿಗೆ ಮಾತುಕತೆ ನಡೆಸುತ್ತಿದ್ದು, ಅಫಘಾನಿಸ್ತಾನದ ಕಾರಗೃಹದಲ್ಲಿರುವ ಬಂಧಿಗಳ ಬಿಡುಗಡೆ ಕುರಿತಂತೆ ಮಾತುಕತೆಗಳು ನಡೆಯುತ್ತಿವೆ ಎಂದು ಡಾನ್ ಪತ್ರಿಕೆ ವರದಿ ಮಾಡಿದೆ.