ದಲೈಲಾಮಾ, ಚೀನಾ ಶಾಂತಿಮಾತುಕತೆ ಅಗತ್ಯ-ಅಮೆರಿಕ ವಾಷಿಂಗ್ಟನ್, ಗುರುವಾರ, 27 ಮಾರ್ಚ್ 2008( 13:49 IST )

ಟಿಬೆಟ್ ಪ್ರತಿಭಟನಾಕಾರರ ವಿರುದ್ದ ಚೀನಾದ ಸೇನಾಪಡೆಗಳು ನಡೆಸುತ್ತಿರುವ ಹಿಂಸಾಚಾರವನ್ನು ಅಂತ್ಯಗೊಳಿಸಿ ದಲೈಲಾಮಾ ಅವರೊಂದಿಗೆ ಚೀನಾ ಶಾಂತಿ ಮಾತುಕತೆ ಪುನರಾರಂಭಿಸಲು ಅಮೆರಿಕ ಅಧ್ಯಕ್ಷ ಜಾರ್ಜ್‌ಬುಷ್ ಮನವಿ ಮಾಡಿದ್ದಾರೆ. ಅಮೆರಿಕ ಅಧ್ಯಕ್ಷ ಜಾರ್ಜ್‌ಬುಷ್ ಚೀನಾದ ಅಧ್ಯಕ್ಷ ಹು ಜಿಂಟಾವೋ ಅವರಿಗೆ ದೂರವಾಣಿ ಕರೆ ಮಾಡಿ ಟಿಬೆಟ್‌ನಲ್ಲಿ ನಡೆಯುತ್ತಿರುವ ಹಿಂಸಾಚಾರವನ್ನು ಕೊನೆಗಾಣಿಸಿ ದಲೈಲಾಮಾ ಅವರೊಂದಿಗೆ ಮಾತುಕತೆ ನಡೆಸುವುದಲ್ಲದೇ ಮಾಧ್ಯಮಗಳನ್ನು ಹಾಗೂ ರಾಯಭಾರಿಗಳನ್ನು ಟಿಬೆಟ್‌ ಪ್ರವೇಶಕ್ಕೆ ಅನುವು ಮಾಡಿಕೊಡಬೇಕು ಎಂದು ಹೇಳಿದ್ದಾರೆ. ಅಮೆರಿಕ ಅಧ್ಯಕ್ಷ ಜಾರ್ಜ್‌ಬುಷ್ ಚೀನಾದ ಅಧ್ಯಕ್ಷ ಹು ಜಿಂಟಾವೋ ಅವರಿಗೆ ಟಿಬೆಟ್‌ನಲ್ಲಿ ನಡೆಯುತ್ತಿರುವ ಹಿಂಸಾಚಾರದ ಬಗ್ಗೆ ಕಳವಳ ವ್ಯಕ್ತಪಡಿಸಿದ್ದು ದಲೈಲಾಮಾ ಅವರ ಪ್ರತಿನಿಧಿಗಳೊಂದಿಗೆ ಮಾತುಕತೆ ನಡೆಸುವುದು ಉತ್ತಮ ಮಾರ್ಗ ಎಂದು ಹೇಳಿದ್ದಾರೆ. ಚೀನಾ ಸರಕಾರದ ಅಧಿಕಾರಿಗಳು ಹಾಗೂ ದಲೈಲಾಮಾ ಪ್ರತಿನಿಧಿಗಳು ಈ ಹಿಂದೆ ಶಾಂತಿಮಾತುಕತೆ ನಡೆಸಿದ್ದು ಅದನ್ನು ಪುನರಾರಂಭಿಸುವ ಅಗತ್ಯವಿದೆ ಎಂದು ಅಮೆರಿಕದ ರಾಷ್ಟ್ರೀಯ ಭದ್ರತಾ ಸಲಹೆಗಾರ ಸ್ಟೀಫನ್ ಹ್ಯಾಡ್ಲಿ ತಿಳಿಸಿದ್ದಾರೆ.