ಈಶಾನ್ಯ ಇರಾನ್‌ನ ಮಷಾದ್‌ನತ್ತ ತೆರಳುತ್ತಿದ್ದ ಕಿರ್ಗಿಸ್ತಾನದ ವಿಮಾನವೊಂದು ಸೋಮವಾರ ಪತನಗೊಂಡು ಕನಿಷ್ಠ 70 ಪ್ರಯಾಣಿಕರು ದುರಂತ ಸಾವನ್ನಪ್ಪಿದ್ದಾರೆ.
ಬೋಯಿಂಗ್ -737 ವಿಮಾನವು ಟೇಕಾಫ್ ಆದ ಕೆಲವೇ ಕ್ಷಣಗಳಲ್ಲಿ ತಾಂತ್ರಿಕ ದೋಷ ಕಂಡು ಬಂದಿದೆಂದು ವಿಮಾನದಲ್ಲಿದ್ದ ಸಿಬ್ಬಂದಿ ಸಂದೇಶ ರವಾನಿಸಿದ್ದರು ಮತ್ತು ವಿಮಾನವನ್ನು ಮಾನಾಸ್‌ಗೆ ಮರಳಿಸುತ್ತಿದ್ದರು. ಆದರೆ ಮಾನಾಸ್‌ಗೆ 2 ಕಿ.ಮೀ. ಸಮೀಪ ಬರುತ್ತಿದ್ದಂತೆಯೇ ವಿಮಾನವು ಪತನವಾಗಿ ತಕ್ಷಣವೇ ಬೆಂಕಿ ಹೊತ್ತಿಕೊಂಡಿತು ಎಂದು ಮೂಲಗಳು ತಿಳಿಸಿವೆ. ಈ ದುರಂತದಲ್ಲಿ ಕೇವಲ 20 ಮಂದಿ ಮಾತ್ರ ಬದುಕುಳಿದಿದ್ದಾರೆ ಎಂದು ವರದಿಗಳು ತಿಳಿಸಿವೆ.
ವಿಮಾನದಲ್ಲಿ ಕಿರ್ಗಿಸ್ತಾನದ ಬಾಸ್ಕೆಟ್‌ಬಾಲ್ ಯುವತಂಡವೂ ಸೇರಿದಂತೆ 83 ಪ್ರಯಾಣಿಕರಿದ್ದರು ಹಾಗೂ 7 ಮಂದಿ ಸಿಬ್ಬಂದಿ ಇದ್ದರು. ಆದರೆ ಒಟ್ಟು ಪ್ರಯಾಣಿಕರ ಸಂಖ್ಯೆ ಎಷ್ಟೆಂಬುದರ ಬಗ್ಗೆ ಇನ್ನೂ ಖಚಿತ ಮಾಹಿತಿ ದೊರಕಿಲ್ಲ. ವಿಮಾನದ ಕ್ಯಾಪ್ಟನ್ ಕೂಡ ಪಾರಾಗಿದ್ದಾರೆ ಎಂದು ಕಿರ್ಗಿಸ್ತಾನ ಪ್ರಧಾನಿ ಐಗರ್ ಚುಡಿನೊವ್ ತಿಳಿಸಿದ್ದಾರೆ. ಈ ವಿಮಾನವು ಕಿರ್ಗಿಸ್ ಸಂಸ್ಥೆಯಾದ ಐಟೆಕ್ ಏರ್‌ಗೆ ಸೇರಿದ್ದಾಗಿದೆಯಾದರೂ, ಇದನ್ನು ಇರಾನ್ ಅಸೆಮಾನ್ ಏರ್‌ಲೈನ್ಸ್ ಕಂಪನಿಯು ನಿರ್ವಹಿಸುತ್ತಿತ್ತು. ಸುರಕ್ಷತಾ ಕಾರಣಗಳಿಗಾಗಿ ಐಟೆಕ್ ಏರ್ ವಿಮಾನಗಳಿಗೆ ಯೂರೋಪಿಯನ್ ಒಕ್ಕೂಟವು ನಿಷೇಧ ವಿಧಿಸಿತ್ತು.
ಪರಿಹಾರ ಕಾರ್ಯಾಚರಣೆಗಳು ಭರದಿಂದ ಸಾಗುತ್ತಿವೆ.
|
ಸಲಹೆ/ಪ್ರತಿಕ್ರಿಯೆ
ಮಿತ್ರನಿಗೆ ಕಳುಹಿಸಿ
ಈ ಪುಟ ಮುದ್ರಿಸಿ