ಪಾಕ್ ಮೇಲೆ ಅಮೆರಿಕ ಕ್ಷಿಪಣಿ ದಾಳಿ: 7 ಸಾವು ಇಸ್ಲಾಮಾಬಾದ್, ಗುರುವಾರ, 18 ಸೆಪ್ಟೆಂಬರ್ 2008( 12:49 IST )

ಪಾಕ್ ಪ್ರದೇಶದ ಮೇಲೆ ಅಮೆರಿಕ ದಾಳಿ ನಡೆಸುವುದಿಲ್ಲ ಎಂಬುದಾಗಿ ಅಮೆರಿಕ ಅಧಿಕಾರಿಗಳು ಭರವಸೆ ನೀಡಿದ ಬೆನ್ನಲ್ಲೇ, ಅಮೆರಿಕ ಸೇನಾ ಪಡೆಯು ಪಾಕಿಸ್ತಾನದಲ್ಲಿ ಕ್ಷಿಪಣಿ ದಾಳಿ ನಡೆಸಿದ್ದು, ಇದರಿಂದಾಗಿ ಏಳು ಮಂದಿ ಸಾವನ್ನಪ್ಪಿದ್ದು, ಮೂರು ಮಂದಿ ಗಾಯಗೊಂಡಿದ್ದಾರೆ. ದಕ್ಷಿಣ ವಜಿರಿಸ್ತಾನದ ಬುಡಗಟ್ಟು ಪ್ರದೇಶದಲ್ಲಿ ಹಲವು ಕ್ಷಿಪಣಿ ದಾಳಿಗಳನ್ನು ಬುಧವಾರ ಸಂಜೆ ನಡೆಸಲಾಗಿದೆ ಎಂದು ಪಾಕಿಸ್ತಾನ ಗುಪ್ತಚರ ಇಲಾಖೆಯ ಅಧಿಕಾರಿಗಳು ತಿಳಿಸಿದ್ದಾರೆ. ತಾಲಿಬಾನ್ ಉಗ್ರಗಾಮಿಗಳು ಹಾಗೂ ಹೆಜ್ಬ್-ಇ-ಇಸ್ಲಾಮಿ ಗುಂಪನ್ನು ಗುರಿಯಾಗಿಸಿ ಈ ದಾಳಿಯನ್ನು ನಡೆಸಲಾಗಿದೆ ಎಂದು ಅಧಿಕಾರಿಗಳು ಹೇಳಿದ್ದಾರೆ. ಈ ದಾಳಿಗೂ ಮುನ್ನ, ಅಮೆರಿಕ ಮತ್ತು ಪಾಕಿಸ್ತಾನದ ಹಿರಿಯ ಅಧಿಕಾರಿಗಳು ಭೇಟಿ ಮಾಡಿ ಭಯೋತ್ಪಾದನೆ ನಿಗ್ರಹದ ಸಾಮಾನ್ಯ ನೀತಿಯ ಕುರಿತಾಗಿ ಮಾತುಕತೆ ನಡೆಸಿದ್ದರು.