ಪಾಕ್:ಆತ್ಯಹತ್ಯಾ ದಾಳಿಗೆ 60 ಬಲಿ ಇಸ್ಲಾಮಾಬಾದ್, ಭಾನುವಾರ, 21 ಸೆಪ್ಟೆಂಬರ್ 2008( 10:40 IST )

PTI ಇಲ್ಲಿನ ನಗರದ ಕೇಂದ್ರ ಭಾಗದಲ್ಲಿರುವ ಮರಿಯಟ್ ಪಂಚತಾರಾ ಹೊಟೇಲ್ ಮೇಲೆ ಶನಿವಾರ ರಾತ್ರಿ ಆತ್ಮಹತ್ಯಾ ಬಾಂಬರ್‌ಗಳು ನಡೆಸಿದ ಭೀಕರ ದಾಳಿಯಲ್ಲಿ ಕನಿಷ್ಠ 60ಮಂದಿ ಬಲಿಯಾಗಿದ್ದು,ನೂರಕ್ಕೂ ಅಧಿಕ ಮಂದಿ ಗಾಯಗೊಂಡಿದ್ದಾರೆ. ಈ ಘಟನೆಯಲ್ಲಿ ಪಂಚತಾರಾ ಹೊಟೇಲ್ ಭಸ್ಮವಾಗಿದ್ದು, ಬೆಂಕಿ ಹೊತ್ತಿ ಉರಿಯುತ್ತಿರುವ ದೃಶ್ಯ ಬಹಳ ದೂರದ ತನಕ ಕಾಣಿಸುತ್ತಿತ್ತಲ್ಲದೆ, ಸ್ಫೋಟದ ಶಬ್ದ ಕೆಲವು ಕಿ.ಮಿ.ವರೆಗೆ ಕೇಳಿಸಿರುವುದಾಗಿ ಡಾನ್ ಚಾನೆಲ್ ವರದಿ ತಿಳಿಸಿದೆ. ಪಾಕಿಸ್ತಾನದ ಇತಿಹಾಸದಲ್ಲಿ ಸಂಭವಿಸಿದ ಅತ್ಯಂತ ಭೀಕರ ಬಾಂಬ್ ಸ್ಫೋಟಗಳಲ್ಲಿ ಇದೂ ಒಂದಾಗಿದ್ದು, ಈ ಹೊಟೇಲ್‌ನಲ್ಲಿ ವಿದೇಶಿಯರೇ ಹೆಚ್ಚಿನ ಸಂಖ್ಯೆಯಲ್ಲಿ ತಂಗುತ್ತಿದ್ದರು. ಸ್ಫೋಟಕ್ಕೆ ಹೊಟೇಲ್ ಹೊರಭಾಗದಲ್ಲಿದ್ದ ಹಲವಾರು ಕಾರುಗಳು,ಮರಗಳು ಸುಟ್ಟು ಕರಕಲಾಗಿರುವುದಾಗಿ ಪ್ರತ್ಯಕ್ಷದರ್ಶಿಗಳು ತಿಳಿಸಿದ್ದಾರೆ.