ಪಾಕ್ ಬಾಂಬ್ ದಾಳಿ: ಜವಾಹರಿ ಬಂಟನ ಬಂಧನ ಲಾಹೋರ್, ಮಂಗಳವಾರ, 23 ಸೆಪ್ಟೆಂಬರ್ 2008( 15:50 IST )

ಕಳೆದ ಶನಿವಾರ ಇಸ್ಲಾಮಾಬಾದಿನ ಪಂಚತಾರಾ ಹೋಟೆಲ್ ಮ್ಯಾರಿಯಟ್‌ನಲ್ಲಿನ ಆತ್ಮಹತ್ಯಾ ಬಾಂಬ್ ದಾಳಿಗೆ ಸಂಬಂಧಿಸಿದಂತೆ, ಅಲ್‌ಖೈದಾದ 2ನೇ ವರಿಷ್ಠ ಐಮನ್ ಅಲ್ ಜವಾಹರಿಯ ಬಲಗೈಬಂಟನೊಬ್ಬನನ್ನು ಬಂಧಿಸಿರುವುದಾಗಿ ಪಾಕಿಸ್ತಾನ ಗುಪ್ತಚರ ಸಂಸ್ಥೆಗಳು ತಿಳಿಸಿವೆ. ಶಂಕಿತ ಉಗ್ರನನ್ನು ಹೆಚ್ಚಿನ ವಿಚಾರಣೆಗಾಗಿ ಇಸ್ಲಾಮಾಬಾದಿಗೆ ಕಳುಹಿಸಲಾಗಿದೆ. ಜೇಮ್‌ಶೆಡ್ ಎಂಬ ಹೆಸರನ್ನು ಹೇಳಿಕೊಳ್ಳುತ್ತಿದ್ದ ಅಲ್‌ಖೈದಾ ಸದಸ್ಯ ಮುರ್ಸಲೀನ್‌‌ನನ್ನು ಭಾನುವಾರ ಗುಜ್ರಾನ್ವಾಲಾದ ಮಸೀದಿಯೊಂದರಲ್ಲಿ ಬಂಧಿಸಲಾಗಿತ್ತು. ಮುರ್ಸಲೀನ್ ನಿಷೇಧಿತ ಉಗ್ರಗಾಮಿ ಸಂಘಟನೆ ಲಷ್ಕರ್-ಎ-ಜಾಂಗ್ವಿಯ ಪ್ರಮುಖ ನಾಯಕನಾಗಿದ್ದು, ಈತನನ್ನು ಬಂಧಿಸಿದವರಿಗೆ ಐದು ಕೋಟಿ ಬಹುಮಾನವನ್ನು ಘೋಷಿಸಲಾಗಿತ್ತು ಎಂದು ವರದಿಗಳು ತಿಳಿಸಿವೆ. ಅಲ್ಲದೆ, ಅಮೆರಿಕ ಫೆಡರಲ್ ತನಿಖಾ ನಿಗಮದ 'ಬೇಕಾದ ವ್ಯಕ್ತಿ'ಗಳ ಪಟ್ಟಿಯಲ್ಲೂ ಮುರ್ಸಲೀನ್ ಹೆಸರಿತ್ತು ಎಂದು ವರದಿಗಳು ಹೇಳಿವೆ. ರಾವಲ್ಪಿಂಡಿಯಲ್ಲಿ ಪಾಕಿಸ್ತಾನ ಮಾಜಿ ಅಧ್ಯಕ್ಷ ಪರ್ವೇಜ್ ಮುಷರಫ್ ಅವರ ಮೇಲಿನ ರಾವಲ್ಪಿಂಡಿಯಲ್ಲಿನ ನಿಶ್ತಾರ್ ಪಾರ್ಕ್‌ನಲ್ಲಿ ದಾಳಿ ಮತ್ತು ಕರಾಚಿಯ ಮೌಲಾನಾ ಹಸನ್ ತುರಾಬಿ ದಾಳಿ ಸೇರಿದಂತೆ ವಿವಿಧ ದಾಳಿಗಳ ಮಾಸ್ಟರ್ ಮೈಂಡ್ ಈತನಾಗಿದ್ದನು ಎಂದು ತಿಳಿದುಬಂದಿದೆ. ಈ ನಡುವೆ, ಅಶಾಂತ ವಾಯುವ್ಯ ಪಾಕಿಸ್ತಾನದಲ್ಲಿ ರಕ್ಷಣಾ ಪಡೆಗಳು 50ಕ್ಕೂ ಹೆಚ್ಚು ಶಂಕಿತ ಉಗ್ರರ ಹತ್ಯೆಗೈದಿದ್ದಾರೆ ಎಂದು ಸೇನಾ ವಕ್ತಾರರು ತಿಳಿಸಿದ್ದಾರೆ.