ಭಯೋತ್ಪಾದನೆಯು ವಿಶ್ವಕ್ಕೆ ಸವಾಲನ್ನೊಡ್ಡುತ್ತಿದೆ ಎಂದು ಪುನರುಚ್ಛರಿಸುವ ಅಮೆರಿಕ ಅಧ್ಯಕ್ಷ ಜಾರ್ಜ್ ಡಬ್ಲ್ಯು ಬುಷ್ , ಭಯೋತ್ಪಾದನೆಯ ವಿರುದ್ಧದ ಹೋರಾಟದಲ್ಲಿ ಸಕ್ರಿಯ ಪಾತ್ರ ವಹಿಸುವಂತೆ ವಿಶ್ವಸಂಸ್ಥೆಗೆ ಒತ್ತಾಯಿಸಿದ್ದಾರೆ.
ಮಂಗಳವಾರ ವಿಶ್ವಸಂಸ್ಥೆ ಪ್ರಧಾನ ಅಸೆಂಬ್ಲಿಯನ್ನುದ್ದೇಶಿಸಿ ಮಾತನಾಡಿದ ಅವರು, ಭಯೋತ್ಪಾದನೆಯ ಹೋರಾಟದಲ್ಲಿನ ವಿಶ್ವಸಂಸ್ಥೆ, ಜಿ8 ಶಕ್ತಿಗಳು ಮತ್ತು ಇತರ ಜಾಗತಿಕ ಸಮೂಹಗಳ ಪ್ರಯತ್ನವನ್ನು ಶ್ಲಾಘಿಸಿದ್ದು, ಭಯೋತ್ಪಾದನೆಯ ಸಂಪೂರ್ಣ ನಿಗ್ರಹಕ್ಕೆ ಇನ್ನಷ್ಟು ಕ್ರಮ ಕೈಗೊಳ್ಳುವಂತೆ ಕರೆ ನೀಡಿದರು.
ಭಯೋತ್ಪಾದನೆಯೆಂಬ ಭೀತಿಯಿಂದ ಜನರು ಸುರಕ್ಷಿತವಾಗುವವರೆಗೆ ಉಗ್ರರ ವಿರುದ್ಧ ಯಾವುದೇ ಕರುಣೆ ತೋರಬಾರದು ಎಂದು ಬುಷ್ ಸ್ಪಷ್ಟಪಡಿಸಿದರು.
ಈ ನಡುವೆ, ವಿಶ್ವಸಂಸ್ಥೆ ಪ್ರಧಾನ ಅಸೆಂಬ್ಲಿಯಲ್ಲಿ ವಿವಿಧ ವಿವಾದಗಳ ಪರಿಹಾರದತ್ತ ದೃಷ್ಟಿ ಹಾಯಿಸಿರುವ ವಿಶ್ವಸಂಸ್ಥೆ ಪ್ರಧಾನ ಅಧ್ಯಕ್ಷ ಬಾನ್ ಕಿ ಮೂನ್, ವಿಶ್ವದ ಗಂಭೀರ ಸಮಸ್ಯೆಗಳಾದ ಹವಾಮಾನ ವೈಪರೀತ್ಯ, ಇಂಧನ ಬಿಕ್ಕಟ್ಟು, ಬಡತನ ಮುಂತಾದವುಗಳ ಪರಿಹಾರಕ್ಕೆ ಒಟ್ಟಾಗಿ ಕಾರ್ಯನಿರ್ವಹಿಸುವಂತೆ ಜಾಗತಿಕ ನಾಯಕರಿಗೆ ಕರೆ ನೀಡಿದರು.
ಎಲ್ಲಾ ರಾಷ್ಟ್ರಗಳೊಂದಿಗೆ ಉತ್ತಮ ಸಂಬಂಧವೃದ್ಧಿಗೊಳಿಸುವಂತೆ ಕರೆ ನೀಡಿದ ಅವರು, ಇತರ ದೇಶಗಳೊಂದಿಗಿನ ಉತ್ತಮ ಸಂಬಂಧದ ಹೊರತಾಗಿ, ಯಾವುದೇ ರಾಷ್ಟ್ರವು ಮಾನವಸಂಪನ್ಮೂಲ ಅಭಿವೃದ್ಧಿ ಅಥವಾ ದೇಶದ ಹಿತಾಸಕ್ತಿ ರಕ್ಷಣೆಯನ್ನು ನಡೆಸಲು ಅಸಾಧ್ಯ ಎಂಬುದಾಗಿ ಒತ್ತಿ ಹೇಳಿದರು.
|
ಸಲಹೆ/ಪ್ರತಿಕ್ರಿಯೆ
ಮಿತ್ರನಿಗೆ ಕಳುಹಿಸಿ
ಈ ಪುಟ ಮುದ್ರಿಸಿ
