ಅಮೆರಿಕ ಅಧ್ಯಕ್ಷೀಯ ಅಭ್ಯರ್ಥಿಯಾಗಿರುವ ಕಪ್ಪು ಜನಾಂಗದ ವ್ಯಕ್ತಿಯಾದ ಬರಾಕ್ ಒಬಾಮಾ ಅಮೆರಿಕ ಸಮಾಜದಲ್ಲಿ ಹತ್ಯೆಯಾಗದೆ ಉಳಿದಿರುವುದೇ ಒಂದು ದೊಡ್ಡ ಪವಾಡ ಎಂದು ಕ್ಯೂಬಾದ ಮಾಜಿ ಅಧ್ಯಕ್ಷ ಫಿಡೆಲ್ ಕ್ಯಾಸ್ಟ್ರೋ ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.
ಅಮೆರಿಕದಲ್ಲಿ ವಿಪರೀತವಾಗಿರುವ ಜನಾಂಗೀಯ ವಿಷಯದಲ್ಲಿ ಕಪ್ಪು ಜನಾಂಗದ ವ್ಯಕ್ತಿಯಾಗಿರುವ ಬರಾಕ್ ಅವರು ಕೊಲೆಯಾಗದೇ ಉಳಿದಿರುವುದು ನಿಜಕ್ಕೂ ಒಂದು ಪವಾಡ ಎಂದು ಕ್ಯಾಸ್ಟ್ರೋ ಅವರು ಕ್ಯೂಬಾ ಡಿಬೇಟ್ ವೆಬ್‌ಸೈಟ್‌ನಲ್ಲಿ ಶನಿವಾರ ಬರೆದಿರುವುದಾಗಿ ವರದಿಯೊಂದು ತಿಳಿಸಿದೆ.
ಒಬ್ಬ ಕಪ್ಪು ಜನಾಂಗದ ವ್ಯಕ್ತಿಯಾಗಿರುವ ಬರಾಕ್ ಅವರು ತಮ್ಮ ಹೆಂಡತಿ, ಮಕ್ಕಳು ವೈಟ್ ಹೌಸ್‌‌ಗೆ ಹೋಗುವ ವಿಚಾರದಲ್ಲಿ ನಿಜಕ್ಕೂ ಕೋಟ್ಯಂತರ ಬಿಳಿ ಜನಾಂಗೀಯ ವ್ಯಕ್ತಿಗಳು ಯಾವುದೇ ಮೈತ್ರಿ ಮಾಡಿಕೊಳ್ಳಲಾರರು ಎಂದು ಫಿಡೆಲ್ ನೇರವಾಗಿ ಆರೋಪಿಸಿದ್ದಾರೆ.
ಆ ನಿಟ್ಟಿನಲ್ಲಿ ಬರಾಕ್ ಬದುಕುಳಿದಿರುವುದು ಪವಾಡವೇ ಎಂದು ಆಶ್ಚರ್ಯ ವ್ಯಕ್ತಪಡಿಸಿರುವ ಅವರು, ಅಮೆರಿಕದ ಅಧ್ಯಕ್ಷೀಯ ಚುನಾವಣೆಯಲ್ಲಿ ಕಪ್ಪು ಜನಾಂಗದ ವ್ಯಕ್ತಿಯೊಬ್ಬ ಡೆಮೊಕ್ರಟಿಕ್ ಪಕ್ಷದಿಂದ ಆರಿಸಿ,ಅಧ್ಯಕ್ಷರಾಗಿ ಆಯ್ಕೆಯಾಗಿ ಬದುಕುಳಿಯುವುದು ಆಶ್ಚರ್ಯದ ಮಾತಾಗಿದೆ ಎಂದು ಹೇಳಿದ್ದಾರೆ.
ತೀವ್ರವಾಗಿ ಕರುಳು ಬೇನೆಯಿಂದ ಬಳುತ್ತಿದ್ದ ಫಿಡೆಲ್ ಕ್ಯಾಸ್ಟ್ರೋ ಅವರು ಇತ್ತೀಚೆಗಷ್ಟೇ ತಮ್ಮ ಸಹೋದರ ರೌಲ್‌ ಅವರನ್ನು ಕ್ಯೂಬಾ ಅಧ್ಯಕ್ಷ ಪಟ್ಟಕ್ಕೆ ಏರಿಸಿದ್ದರು. ಆ ಬಳಿಕ ಅವರು ಸಾರ್ವಜನಿಕವಾಗಿ ಎಲ್ಲೂ ಕಾಣಿಸಿಕೊಂಡಿಲ್ಲ. ಇದೀಗ ರಹಸ್ಯ ಸ್ಥಳದಲ್ಲಿರುವ ಅವರು ಪ್ರಥಮ ಬಾರಿಗೆ ಅಮೆರಿಕ ವಿರುದ್ಧ ಮತ್ತೆ ಹರಿಹಾಯ್ದು ಪ್ರತಿಕ್ರಿಯೆ ನೀಡಿದ್ದಾರೆ. | 
ಸಲಹೆ/ಪ್ರತಿಕ್ರಿಯೆ
ಮಿತ್ರನಿಗೆ ಕಳುಹಿಸಿ
ಈ ಪುಟ ಮುದ್ರಿಸಿ