ತನ್ನ ಎಲ್ಟಿಟಿಇ ಸೇನೆ ಸಂಪೂರ್ಣವಾಗಿ ನಾಶವಾಗುತ್ತಿದೆ ಎಂಬ ಭಯದ ಹಿನ್ನೆಲೆಯಲ್ಲಿ, ಇದೀಗ ಎಲ್ಟಿಟಿಇ ಮುಖಂಡರು ತಮಿಳುನಾಡಿನ ನಾಯಕರಿಂದ ಶ್ರೀಲಂಕಾ ಸರ್ಕಾರದ ಮೇಲೆ ಒತ್ತಡ ಹೇರುವ ತಂತ್ರಕ್ಕೆ ಮುಂದಾಗಿರುವುದಾಗಿ ಶ್ರೀಲಂಕಾ ಸರ್ಕಾರದ ರಕ್ಷಣಾ ಕಾರ್ಯದರ್ಶಿ ಗೊತಭಾಯಿ ರಾಜಪಕ್ಸೆ ತಿಳಿಸಿದ್ದಾರೆ.
ಶ್ರೀಲಂಕಾದಲ್ಲಿರುವ ತಮಿಳರ ಪರವಾಗಿ ದಿಢೀರನೆ ಹೇಳಿಕೆ ನೀಡುತ್ತಿರುವ ತಮಿಳುನಾಡು ನಾಯಕರು ಶ್ರೀಲಂಕಾ ಸರ್ಕಾರದ ಮೇಲೆ ಒತ್ತಡದ ತಂತ್ರ ಹೇರುವಂತೆ ಎಲ್ಟಿಟಿಇ ಕಸರತ್ತು ನಡೆಸಿದೆ. ಆದರೆ ಎಲ್ಟಿಟಿಇ ಸೇನಾ ದಾಳಿಗಳಿಂದ ತಪ್ಪಿಸಿಕೊಳ್ಳಲು ನಾವು ಬಿಡುವುದಿಲ್ಲ ಎಂದು ಗೊತಭಾಯಿ ಸುದ್ದಿಸಂಸ್ಥೆಯೊಂದಕ್ಕೆ ಹೇಳಿದ್ದಾರೆ.
ಭಾರತದ ಪ್ರಧಾನಿ ಮನಮೋಹನ್ ಸಿಂಗ್ ಅವರು ಶನಿವಾರವಷ್ಟೇ ಈ ವಿಷಯದ ಕುರಿತು ಶ್ರೀಲಂಕಾದ ಪ್ರಧಾನಿ ಜೊತೆ ದೂರವಾಣಿಯಲ್ಲಿ ಮಾತುಕತೆ ನಡೆಸಿದ್ದರು.
ಎಲ್ಟಿಟಿಇ ಮೇಲೆ ದಾಳಿ ನಡೆಸುವ ಭರದಲ್ಲಿ ಶ್ರೀಲಂಕಾದಲ್ಲಿರುವ ತಮಿಳರ ರಕ್ಷಣೆಗೆ ಧಕ್ಕೆಯಾಗಬಾರದು ಎಂದು ಅವರು ಈ ಸಂದರ್ಭ ತಮಿಳರ ಬಗ್ಗೆ ತಮ್ಮ ಕಳಕಳಿ ವ್ಯಕ್ತಪಡಿಸಿದ್ದರು.
ಶ್ರೀಲಂಕಾ ಸರ್ಕಾರ ಕೂಡಲೇ ಎಲ್ಟಿಟಿಇ ಮೇಲಿನ ಸೇನಾ ದಾಳಿ ಸ್ಥಗಿತಗೊಳಿಸಬೇಕು. ಈ ದಿಸೆಯಲ್ಲಿ ನಿರ್ದಿಷ್ಟ ಚೌಕಟ್ಟಿನ ನಡುವೆ ರಾಜಕೀಯ ಶಾಂತಿ ಮಾತುಕತೆಗಳು ನಡೆಯಬೇಕು ಎಂದು ಒತ್ತಾಯಿಸಿದ್ದಾರೆ.
ತಮಿಳರ ಅಥವಾ ಬೇರಾವುದೇ ಸಮುದಾಯದ ರಕ್ಷಣೆ ಪ್ರಶ್ನೆ ಬಂದಾಗ ಅವುಗಳನ್ನು ರಾಜಕೀಯ ಮಾತುಕತೆಯಿಂದ ಬಗೆಹರಿಸಿಕೊಳ್ಳುತ್ತೇವೆ ಎಂೆದು ಈಗಾಗಲೇ ಶ್ರೀಲಂಕಾ ಅಧ್ಯಕ್ಷರು ಸ್ಪಷ್ಟಪಡಿಸಿದ್ದಾರೆ. | 
ಸಲಹೆ/ಪ್ರತಿಕ್ರಿಯೆ
ಮಿತ್ರನಿಗೆ ಕಳುಹಿಸಿ
ಈ ಪುಟ ಮುದ್ರಿಸಿ