ಮಧ್ಯ ಸುಡಾನ್‌ನಲ್ಲಿ ಒತ್ತೆಯಾಳಾಗಿ ಇರಿಸಿಕೊಂಡಿದ್ದ ಒಂಭತ್ತು ಮಂದಿ ತೈಲ ಕಾರ್ಮಿಕರ ಪೈಕಿ ಐದು ಮಂದಿಯನ್ನು ಅಪಹರಣಕಾರರು ಹತ್ಯೆಗೈದಿದ್ದಾರೆಂದು ಸುಡಾನ್ ವಿದೇಶಾಂಗ ಸಚಿವಾಲಯ ಹೇಳಿದೆ.
ಐದು ಒತ್ತೆಯಾಳುಗಳು ಕೊಲೆಯಾಗಿದ್ದು, ಇತರ ಇಬ್ಬರು ಸಣ್ಣಪುಟ್ಟ ಗಾಯಗಳೊಂದಿಗೆ ಪರಾರಿಯಾಗುವಲ್ಲಿ ಯಶಸ್ವಿಯಾಗಿದ್ದಾರೆಂದು ಸಚಿವಾಲಯದ ವಕ್ತಾರರಾದ ಆಲಿ ಅಲ್-ಸಾದಿಗ್ ತಿಳಿಸಿದ್ದಾರೆ.
ದಾರ್‌ಫುರ್ ಬಂಡಾಯ ಸಂಘಟನೆ ನ್ಯಾಯ ಮತ್ತು ಸಮಾನತೆಯ ಚಳುವಳಿ (ಜೆಇಎಮ್‌)ಯ ಕಾರ್ಯಕರ್ತರಾಗಿರುವ ಅಪಹರಣಕಾರರು ಇನ್ನು ಇಬ್ಬರನ್ನು ಒತ್ತೆಯಾಳುಗಳಾಗಿ ಇರಿಸಿಕೊಂಡಿದ್ದಾರೆ. ಜೆಇಎಮ್‌ ಸಂಘಟನೆಯ ನೇರ ಸೂಚನೆಯೊಂದಿಗೆ ಈ ಕೃತ್ಯವನ್ನು ನಡೆಸಲಾಗಿದೆಯೆಂದು ಅವರು ತಿಳಿಸಿದರು.
ತೈಲ ಕಾರ್ಮಿಕರನ್ನು ಅಕ್ಟೋಬರ್ 19ರಂದು ಮಧ್ಯ ಸುಡಾನ್‌ನ ದಕ್ಷಿಣ ಕೊರ್‌ಡೊಫಾನ್‌ನಿಂದ ವಶಪಡಿಸಿಕೊಳ್ಳಲಾಗಿದೆ. ಇದು ಕಳೆದೊಂದು ವರ್ಷದಿಂದ ಈ ಪ್ರದೇಶದಲ್ಲಿ ನಡೆಯುತ್ತಿರುವ ಇಂತಹ ಮ‌ೂರನೇ ಘಟನೆಯಾಗಿದೆ.
ಸ್ಥಳೀಯ ಆದಿವಾಸಿಗಳಿಗೆ ಅಪಹರಣಕಾರರಿಂದ ತೊಂದರೆಗೆ ಈಡಾಗುವ ಸಾಧ್ಯತೆ ಕಡಿಮೆಯಾಗಿದೆಯೆಂದು ರಾಜತಾಂತ್ರಿಕರು ಹೇಳಿದ್ದಾರೆ. ಕಳೆದ ಮೇ ತಿಂಗಳಿನಲ್ಲಿ ಒಬ್ಬ ಸುಡಾನ್ ಡ್ರೈವರ್ ಸಹಿತ ನಾಲ್ಕು ಭಾರತೀಯ ತೈಲ ಕಾರ್ಮಿಕರನ್ನು ಅಪಹರಿಸಲಾಗಿತ್ತು. | 
ಸಲಹೆ/ಪ್ರತಿಕ್ರಿಯೆ
ಮಿತ್ರನಿಗೆ ಕಳುಹಿಸಿ
ಈ ಪುಟ ಮುದ್ರಿಸಿ