ಜೀವಕೋಶದಿಂದ ಮತ್ತಷ್ಟು ಜೀವಕೋಶಗಳನ್ನು ಸೃಷ್ಟಿಸುವ ಸ್ಟೆಮ್‌ಸೆಲ್ ಸಂಶೋಧನೆಗೆ ಆರ್ಥಿಕ ನೆರವು ನೀಡುವುದರ ವಿರುದ್ಧ ಎಂಟು ವರ್ಷಗಳ ನಿಷೇಧವನ್ನು ತೆರವು ಮಾಡಿದ್ದರೂ ಅಮೆರಿಕದಲ್ಲಿ ಮಾನವ ತದ್ರೂಪು ಸೃಷ್ಟಿಗೆ ತಾವು ಅವಕಾಶ ನೀಡುವುದಿಲ್ಲ ಎಂದು ಅಮೆರಿಕದ ಅಧ್ಯಕ್ಷ ಬರಾಕ್ ಒಬಾಮಾ ಹೇಳಿದ್ದಾರೆ.
ಮಾನವ ಸಂತಾನಾಭಿವೃದ್ಧಿಗೆ ಕ್ಲೋನಿಂಗ್ ಬಳಸುವುದಕ್ಕೆ ತಮ್ಮ ಸರ್ಕಾರ ಮುಕ್ತ ಬಾಗಿಲು ತೆಗೆಯುವುದಿಲ್ಲ ಎಂದು ಒಬಾಮಾ ಪ್ರತಿಕ್ರಿಯಿಸಿದ್ದಾರೆ. ಸ್ಟೆಮ್‌ಸೆಲ್ ಸಂಶೋಧನೆಗೆ ಆರ್ಥಿಕ ನೆರವು ನಿಷೇಧ ತೆರವು ಮಾಡುವ ಎಕ್ಸಿಕ್ಯೂಟಿವ್ ಆದೇಶಕ್ಕೆ ಸಹಿ ಮಾಡುವುದಕ್ಕೆ ಮುಂಚಿತವಾಗಿ ಒಬಾಮಾ ಮೇಲಿನ ಪ್ರತಿಕ್ರಿಯೆ ನೀಡಿದ್ದಾರೆ.
ಸ್ಟೆಮ್‌ಸೆಲ್ ಸಂಶೋಧನೆಗೆ ಕಠಿಣ ನಿರ್ಬಂಧಗಳನ್ನು ಜಾರಿ ಮಾಡುವುದಾಗಿ ಒಬಾಮಾ ಭರವಸೆ ನೀಡುತ್ತಾ, ಪ್ರತಿರೂಪಸೃಷ್ಟಿ ಅಪಾಯಕಾರಿ, ನಮ್ಮ ಸಮಾಜದಲ್ಲಿ ಅಥವಾ ಯಾವುದೇ ಸಮಾಜದಲ್ಲಿ ಇದಕ್ಕೆ ಸ್ಥಾನವಿಲ್ಲ ಎಂದು ನುಡಿದರು.
ನಮ್ಮ ಆಡಳಿತವು ಸ್ಟೆಮ್‌ಸೆಲ್ ಸಂಶೋಧನೆಯನ್ನು ಹಗುರವಾಗಿ ಪರಿಗಣಿಸುವುದಿಲ್ಲ ಎಂದು ಹೇಳಿದ ಒಬಾಮಾ, ಅದು ವೈಜ್ಞಾನಿಕವಾಗಿ ಉಪಯುಕ್ತ ಮತ್ತು ಜವಾಬ್ದಾರಿಯಿಂದ ನಡೆಸಿದ್ದೆಂದು ಅರಿವಾದರೆ ಮಾತ್ರ ಸಂಶೋಧನೆಗೆ ಬೆಂಬಲಿಸುವುದಾಗಿ ಹೇಳಿದರು. ನಾವು ಕಠಿಣ ಮಾರ್ಗದರ್ಶಕಗಳನ್ನು ಜಾರಿಗೆ ತರುವುದಲ್ಲದೇ ಸಂಶೋಧನೆಯ ದುರ್ಬಳಕೆಯನ್ನು ಮಾತ್ರ ಸಹಿಸುವುದಿಲ್ಲ ಎಂದು ಅವರು ನುಡಿದರು. | 
ಸಲಹೆ/ಪ್ರತಿಕ್ರಿಯೆ
ಮಿತ್ರನಿಗೆ ಕಳುಹಿಸಿ
ಈ ಪುಟ ಮುದ್ರಿಸಿ