ವೆಸ್ಟ್ ಬ್ಯಾಂಕ್‌: 20 ಹಮಾಸ್ ನಾಯಕರ ಸೆರೆ

ಜೆರುಸಲೆಂ, ಗುರುವಾರ, 19 ಮಾರ್ಚ್ 2009( 18:31 IST )

ವೆಸ್ಟ್ ಬ್ಯಾಂಕ್‌ನಲ್ಲಿ ನಸುಕಿನಲ್ಲಿ ದಾಳಿ ಮಾಡಿದ ಇಸ್ರೇಲಿನ ಸೇನೆ ಪ್ಯಾಲೆಸ್ಟೀನ್ ಉಪ ಪ್ರಧಾನಮಂತ್ರಿ ಸೇರಿದಂತೆ ಹಮಾಸ್‌ನ 20 ಉನ್ನತಕಾರ್ಯಕರ್ತರನ್ನು ಬಂಧಿಸಿದ್ದಾರೆ.

ಇಸ್ರೇಲಿನ ಅಪಹೃತ ಸೈನಿಕನ ಬಿಡುಗಡೆ ಪ್ರಯತ್ನ ವಿಫಲವಾದ ಬಳಿಕ ಈ ಕ್ರಮವನ್ನು ಒತ್ತಡಹಾಕುವ ತಂತ್ರವೆಂದು ಭಾವಿಸಲಾಗಿದೆ. ಬಂಧಿತರಲ್ಲಿ ಮಾಜಿ ಪ್ಯಾಲೇಸ್ಟೀನ್ ಉಪಪ್ರಧಾನಮಂತ್ರಿ ನಾಸೀರ್ ಶಾರ್ ಕೂಡ ಸೇರಿದ್ದಾರೆಂದು ಗಾಜಾದ ಅಧಿಕಾರಿಗಳು ತಿಳಿಸಿದ್ದಾರೆ.

10 ಹಮಾಸ್ ನಾಯಕರ ಬಂಧನ ಬಗ್ಗೆ ಇಸ್ರೇಲ್ ದೃಢಪಡಿಸಿದ್ದರೂ, ಇನ್ನಷ್ಟು ವಿವರ ನೀಡಲು ನಿರಾಕರಿಸಿದೆ. ಬುಧವಾರ ರಾತ್ರಿ ಇಸ್ರೇಲ್ ರಕ್ಷಣಾ ಪಡೆಗಳು ಮತ್ತು ಆಂತರಿಕ ಭದ್ರತಾ ಏಜನ್ಸಿಯ ಜಂಟಿ ಕಾರ್ಯಾಚರಣೆಯಲ್ಲಿ ಭಯೋತ್ಪಾದನೆ ಸಂಘಟನೆಯ ಪ್ರಮುಖರು ಬಂಧಿತರಾಗಿದ್ದಾರೆಂದು ಅಧಿಕೃತ ಹೇಳಿಕೆ ತಿಳಿಸಿದೆ.

ಈ ವಲಯದಲ್ಲಿ ಹಮಾಸ್ ಭಯೋತ್ಪಾದನೆ ಸಂಘಟನೆಯ ಆಡಳಿತಾತ್ಮಕ ಶಾಖೆಯ ಮರುಸ್ಥಾಪನೆಗೆ ಮತ್ತು ಹಮಾಸ್ ಅಧಿಕಾರ ಮತ್ತು ಪ್ರಭಾವ ಬಲಪಡಿಸಲು ಪ್ರಯತ್ನಿಸುತ್ತಿದ್ದರೆಂದು ಹೇಳಿಕೆ ತಿಳಿಸಿದೆ.