ತಾಲಿಬಾನ್ ಪ್ರಾಬಲ್ಯದ ಸ್ವಾತ್ ಕಣಿವೆಯಲ್ಲಿ ಶಾಂತಿ ಪ್ರಕ್ರಿಯೆಯನ್ನು ಮುಂದುವರಿಸಲು ಸದ್ಭಾವನೆಯ ಸಂಕೇತವಾಗಿ ಪಾಕಿಸ್ತಾನದ ಅಧಿಕಾರಿಗಳು ಶುಕ್ರವಾರ ಬಂಧಿತ 20 ಉಗ್ರಗಾಮಿಗಳನ್ನು ಬಿಡುಗಡೆ ಮಾಡಿದ್ದಾರೆ.
ಬಿಡುಗಡೆಯಾದ ಉಗ್ರಗಾಮಿಗಳು ತಾಲಿಬಾನ್ ವಕ್ತಾರ ಮುಸ್ಲಿಂ ಖಾನ್ ಸೋದರ ನುರುಲ್ ಹುಡಾ ಸೇರಿದ್ದಾನೆಂದು ಸ್ವಾತ್ ಅಧಿಕಾರಿಗಳು ತಿಳಿಸಿದ್ದಾಗಿ ಎಪಿಪಿ ಸುದ್ದಿಸಂಸ್ಥೆ ವರದಿ ಮಾಡಿದೆ.
ವಾಯವ್ಯ ಗಡಿ ಪ್ರಾಂತೀಯ ಸರ್ಕಾರ ಮತ್ತು ಸೂಫಿ ಮಹಮದ್ ನೇತೃತ್ವದ ಧಾರ್ಮಿಕ ತೀವ್ರವಾದಿಗಳ ಗುಂಪಾದ ಟಿಎನ್‌ಎಸ್‌ಎಂ ನಡುವೆ ಅಂಕಿತ ಹಾಕಲಾದ ಶಾಂತಿ ಒಪ್ಪಂದದ ಅನ್ವಯ ಉಗ್ರರನ್ನು ಬಿಡುಗಡೆ ಮಾಡಲಾಗಿದೆ. ಬಿಡುಗಡೆಯಾದ 20 ಉಗ್ರರನ್ನು ಶಾಂತಿ ಸಮಿತಿಗೆ ಹಸ್ತಾಂತರಿಸಲಾಗಿದೆ.
ಒಪ್ಪಂದಕ್ಕೆ ಅಂಕಿತ ಹಾಕಿದ ಮೇಲೆ ಇದುವರೆಗೂ 20ಕ್ಕೂ ಹೆಚ್ಚು ತಾಲಿಬಾನಿಗಳ ಬಿಡುಗಡೆಯಾಗಿದೆ. ಸ್ಥಳೀಯ ಆಡಳಿತ, ಭದ್ರತಾ ಪಡೆಗಳು ಮತ್ತು ಟಿಎನ್‌ಎಸ್‌ಎಂ ಸದಸ್ಯರು ಮತ್ತು ಶಾಂತಿಸಮಿತಿಯ ನಡುವೆ ಸುದೀರ್ಘ ಮಾತುಕತೆಯ ಬಳಿಕ ಉಗ್ರರನ್ನು ಬಿಡುಗಡೆ ಮಾಡಲಾಗಿದೆ. ಬಂಧಮುಕ್ತರಾದ ಉಗ್ರಗಾಮಿಗಳು ಮತ್ತೆ ಹಿಂಸಾಚಾರಕ್ಕೆ ಇಳಿಯುವುದಿಲ್ಲ ಎಂದು ಶಾಂತಿಸಮಿತಿಯು ಸರ್ಕಾರಕ್ಕೆ ಭರವಸೆ ನೀಡಿದೆ. | 
ಸಲಹೆ/ಪ್ರತಿಕ್ರಿಯೆ
ಮಿತ್ರನಿಗೆ ಕಳುಹಿಸಿ
ಈ ಪುಟ ಮುದ್ರಿಸಿ