ಮನೆಯಲ್ಲಿ ನಡೆದ ಔತಣಕೂಟವೊಂದರಲ್ಲಿ ಅಮೆರಿಕದ ಉಪಾಧ್ಯಕ್ಷ ಜೋಯಿ ಬಿಡೆನ್ ಪುತ್ರಿಯು ಕೊಕೇನ್ ಮಾದಕದ್ರವ್ಯವನ್ನು ಸೇವಿಸುತ್ತಿದ್ದ ವಿಡಿಯೊ ದೃಶ್ಯವು ಶ್ವೇತಭವನದಲ್ಲಿ ಅಲ್ಲೋಲಕಲ್ಲೋಲವೆಬ್ಬಿಸಿದೆ.
ತವರು ರಾಜ್ಯ ದೆಲಾವೇರ್‌ನ ಮನೆಯಲ್ಲಿ ನಡೆದ ಔತಣಕೂಟದಲ್ಲಿ 27ರ ಪ್ರಾಯದ ಆಶ್ಲಿ ಬಿಡೆನ್ ಕೊಕೇನ್ ಬಿಳಿಯ ಪುಡಿಯನ್ನು ಮ‌ೂಗಿನ ಮ‌ೂಲಕ ಸೇವಿಸಿದ್ದನ್ನು ವಿಡಿಯೋ ಚಿತ್ರೀಕರಣ ತೋರಿಸಿದೆ.
ಮೆಕ್ಸಿಕೊದಲ್ಲಿ ಹಿಂಸಾತ್ಮಕ ಮಾದಕದ್ರವ್ಯ ಕದನಗಳ ಆರೋಪದಲ್ಲಿ ಅಮೆರಿಕದ ಪಾಲು ಕೂಡ ಇದೆಯೆಂದು ಅಮೆರಿಕ ವಿದೇಶಾಂಗ ಕಾರ್ಯದರ್ಶಿ ಹಿಲರಿ ಕ್ಲಿಂಟನ್ ಹೇಳಿದ ಕೆಲವೇ ದಿನಗಳಲ್ಲಿ ಬಿಡೆನ್ ಪುತ್ರಿಯ ಕೊಕೇನ್ ಸೇವನೆ ಬೆಳಕಿಗೆ ಬಂದಿದೆ. ಕುಮಾರಿ ಬಿಡೆನ್‌‌ನ ಪುರುಷ ಪರಿಚಯಸ್ಥನೊಬ್ಬ ವಾಷಿಂಗ್ಟನ್ ವಕೀಲರೊಬ್ಬರ ಮ‌ೂಲಕ ವಿಡಿಯೊ ಮಾರಾಟದ ಪ್ರಸ್ತಾಪವನ್ನು ಮಂಡಿಸಿದ್ದು, ಸುಮಾರು 43 ನಿಮಿಷಗಳ ವಿಡಿಯೊ ದೃಶ್ಯಗಳನ್ನು ವೀಕ್ಷಿಸಿದ್ದಾಗಿ ನ್ಯೂಯಾರ್ಕ್ ಪೋಸ್ಟ್ ತಿಳಿಸಿದೆ.
ಉಪಾಧ್ಯಕ್ಷರ ಪುತ್ರಿಯನ್ನು ಹೋಲುವ ಮಹಿಳೆಯೊಬ್ಬಳು ಬಾಯಿಯಿಂದ ಕೆಂಪು ಪ್ಲಾಸ್ಟಿಕ್ ಕೊಳವೆ ತೆಗೆದು ಅದನ್ನು ಮ‌ೂಗಿನಲ್ಲಿ ತೂರಿಸಿ, ಕೊಕೇನ್ ಬಿಳಿಯ ಪುಡಿಯನ್ನು ಅದರ ಮ‌ೂಲಕ ಎಳೆದುಕೊಳ್ಳುತ್ತಿದ್ದುದನ್ನು ವಿಡಿಯೋ ತೋರಿಸಿದೆ. ಬಳಿಕ ಎದ್ದುನಿಂತ ಮಹಿಳೆ ಕೋಣೆಯಲ್ಲಿದ್ದ ಇತರೆ ಜನರೊಂದಿಗೆ ಸಂಭಾಷಣೆಯಲ್ಲಿ ನಿರತಳಾದಾಗ ಆಕೆಯ ಗೆಳೆಯನೆಂಬ ಗುರುತಿಸಲಾದ ವ್ಯಕ್ತಿಯೊಬ್ಬ ಹಿಂದಿನಿಂದ ನೋಡುತ್ತಿದ್ದನೆಂದು ಹೇಳಲಾಗಿದೆ.
ಆನ್‌ಲೈನ್ ಗಾಸಿಪ್ ಸೈಟ್ ರಾಡ್ರೋಲೈನ್.ಕಾಮ್, ತನ್ನ ಹವ್ಯಾಸಿ ವರದಿಗಾರರೊಬ್ಬರು ವಿಡಿಯೊವನ್ನು ವೀಕ್ಷಿಸಿದ್ದಾಗಿ ತಿಳಿಸಿದೆ. ಮಾರಾಟಗಾರನು ಮೊದಲಿಗೆ ವಿಡಿಯೊವನ್ನು 2 ಮಿಲಿಯ ಡಾಲರ್‌ಗೆ ಮಾಧ್ಯಮಕ್ಕೆ ಮಾರಲು ಯೋಜಿಸಿ ಬಳಿಕ ಅದರ ದರವನ್ನು 4 ಲಕ್ಷ ಡಾಲರ್‌ಗೆ ಇಳಿಸಿದನೆಂದು ನ್ಯೂಯಾರ್ಕ್ ಪೋಸ್ಟ್ ತಿಳಿಸಿದೆ.
| 
ಸಲಹೆ/ಪ್ರತಿಕ್ರಿಯೆ
ಮಿತ್ರನಿಗೆ ಕಳುಹಿಸಿ
ಈ ಪುಟ ಮುದ್ರಿಸಿ