ಶಂಕಿತ ಅಮೆರಿಕದ ಡ್ರೋನ್ ವಿಮಾನದಿಂದ ಹಾರಿಸಿದ ಕ್ಷಿಪಣಿಯು ಅಪ್ಪಳಿಸಿ ಆಫ್ಘಾನಿಸ್ತಾನ ಗಡಿಗೆ ಸಮೀಪ ಕನಿಷ್ಠ 10 ಜನರು ಅಸುನೀಗಿದ್ದಾರೆಂದು ಪ್ರತ್ಯಕ್ಷದರ್ಶಿಗಳು ತಿಳಿಸಿದ್ದಾರೆ.
ಓರ್ಕಾಜಾಯ್ ಬುಡಕಟ್ಟು ಪ್ರದೇಶದಲ್ಲಿ ಕ್ಷಿಪಣಿಯು ಮನೆಯ ಮೇಲೆ ಅಪ್ಪಳಿಸಿದ್ದು, ಮನೆಯನ್ನು ತಾಲಿಬಾನ್ ಶಿಬಿರವಾಗಿ ಪರಿವರ್ತಿಸಲಾಗಿತ್ತೆಂದು ನಿವಾಸಿಗಳು ಮತ್ತು ಸ್ಥಳೀಯ ಪತ್ರಕರ್ತರು ತಿಳಿಸಿದ್ದಾರೆ.
ಕ್ಷಿಪಣಿ ದಾಳಿ ನಡೆದ ಕೂಡಲೇ ತಾಲಿಬಾನ್ ಉಗ್ರರು ಇಡೀ ಪ್ರದೇಶವನ್ನು ಸುತ್ತುವರೆದರು ಎಂದು ಅವರು ಹೇಳಿದ್ದಾರೆ. ಡ್ರೋನ್ ದಾಳಿಗಳನ್ನು ನಡೆಸುವ ಮುಂಚೆ ತಮ್ಮ ಸರ್ಕಾರವು ಪಾಕಿಸ್ತಾನದ ಜತೆ ಸಮಾಲೋಚನೆ ನಡೆಸುತ್ತದೆಂದು ಕಳೆದ ವಾರ ಅಮೆರಿಕದ ಅಧ್ಯಕ್ಷ ಬರಾಕ್ ಒಬಾಮಾ ತಿಳಿಸಿದ್ದರು. ಇಂತಹ ಡ್ರೋನ್ ದಾಳಿಗಳಿಗೆ ಪಾಕಿಸ್ತಾನ ಟೀಕೆ ಮಾಡಿದ್ದು, ಆಗಾಗ್ಗೆ ನಾಗರಿಕರು ಬಲಿಯಾಗುತ್ತಿದ್ದು, ಉಗ್ರಗಾಮಿಗಳಿಗೆ ಕುಮ್ಮಕ್ಕು ಸಿಗುತ್ತಿದೆಯೆಂದು ತಿಳಿಸಿದೆ.
ಅಮೆರಿಕದ ಡ್ರೋನ್ ದಾಳಿಗೆ ಪ್ರತೀಕಾರವಾಗಿ ಲಾಹೋರ್ ಪೊಲೀಸ್ ಅಕಾಡೆಮಿ ಮೇಲೆ ದಾಳಿ ನಡೆಸಲಾಗಿದೆ ಎಂದು ತಾಲಿಬಾನ್ ನಾಯಕ ಬೈತುಲ್ಲಾ ಮಸೂದ್ ಮಂಗಳವಾರ ತಿಳಿಸಿದ್ದು, ಪಾಕಿಸ್ತಾನ ಸರ್ಕಾರ ಅಮೆರಿಕಕ್ಕೆ ಒತ್ತಾಸೆ ನಿಲ್ಲಿಸುವ ತನಕ ದಾಳಿಗಳು ಮುಂದುವರಿಯುತ್ತದೆಂದು ಹೇಳಿದ್ದಾನೆ. | 
ಸಲಹೆ/ಪ್ರತಿಕ್ರಿಯೆ
ಮಿತ್ರನಿಗೆ ಕಳುಹಿಸಿ
ಈ ಪುಟ ಮುದ್ರಿಸಿ