ಅಮೆರಿಕದಲ್ಲಿ ತಿಗಣೆಗಳ ಕಾಟ ನಿವಾರಣೆಗೊಂದು ಸಮಾವೇಶ

ಅಮೆರಿಕ ಸರ್ಕಾರ ಪ್ರಪ್ರಥಮ ಬಾರಿಗೆ ಸಮಾವೇಶವೊಂದನ್ನು ಆಯೋಜಿಸಿದೆ. ಅಮೆರಿಕದಲ್ಲಿ ಸಮಾವೇಶವೇ ನಡೆದಿಲ್ಲವೆಂದು ಇದರ ಅರ್ಥವಲ್ಲ. ಅಮೆರಿಕ ಆಯೋಜಿಸಿರುವುದು ವಿಶಿಷ್ಠವಾದ ತಿಗಣೆ ಸಮಾವೇಶ. ರಕ್ತ ಹೀರುವ ಕೀಟಗಳು ಅಮೆರಿಕದ ಮೇಲೆ ಮರುದಾಳಿ ನಡೆಸಿರುವುದು ತಲೆನೋವಾಗಿ ಪರಿಣಮಿಸಿದೆ.

ದಶಕಗಳ ಹಿಂದೆಯೇ ತಿಗಣೆಗಳನ್ನು ಅಕ್ಷರಶಃ ಮ‌ೂಲೋತ್ಪಾಟನೆ ಮಾಡಲಾಗಿದ್ದರೂ, ಅನೇಕ ನಗರಗಳ ವಸತಿನಿಲಯಗಳು, ಆಸ್ಪತ್ರೆಗಳು ಮತ್ತು ಹೊಟೆಲ್ ಕೋಣೆಗಳಲ್ಲಿ ತಿಗಣೆಗಳು ಮರುಪ್ರವೇಶ ಪಡೆದಿವೆ. ಹಾಸಿಗೆಗಳು, ಸೋಫಾಗಳು ಮತ್ತು ಶೀಟುಗಳನ್ನು ಆಶ್ರಯತಾಣವಾಗಿ ಮಾಡಿಕೊಳ್ಳುವ ತಿಗಣೆಗಳು ರಾತ್ರಿ ವೇಳೆ ಸುಖನಿದ್ರೆಗೆ ಜಾರುವ ಗ್ರಾಹಕರನ್ನು ಬಲಿಪಶು ಮಾಡಿ ಅವರ ನಿದ್ರೆ ಕೆಡಿಸುತ್ತವೆ. ತಿಗಣೆಗಳು ರೋಗಕಾರಕವಲ್ಲದಿದ್ದರೂ ಕಚ್ಚಿಸಿಕೊಂಡರೆ ಮೈಕೈಯಲ್ಲಿ ನವೆ ಉಂಟಾಗಿ ಬಾತುಕೊಳ್ಳುತ್ತದೆಂದು ಕೆಲವರು ದೂರಿದ್ದಾರೆ.

ಮನೆಮಾಲೀಕರು, ಹೊಟೆಲ್ ಮಾಲೀಕರು ಮತ್ತು ವಸತಿ ಪ್ರಾಧಿಕಾರದಿಂದ ದಿನೇ ದಿನೇ ದೂರುಗಳು ಬರತೊಡಗಿದ್ದರಿಂದ ಅಮೆರಿಕದ ಪರಿಸರ ರಕ್ಷಣೆ ಏಜೆನ್ಸಿ ಎರಡು ದಿನಗಳ ತಿಗಣೆ ನಿರ್ಮೂಲನಾ ಸಮಾವೇಶ ಏರ್ಪಡಿಸಿ ಪರಿಹಾರೋಪಾಯ ಕುರಿತು ಚಿಂತನಮಂಥನ ನಡೆಸಲಿದೆ. ಎರಡನೇ ಮಹಾಯುದ್ಧಕ್ಕೆ ಮುಂಚಿತವಾಗಿ ತಿಗಣೆಗಳು ಅಧಿಕ ಸಂಖ್ಯೆಯಲ್ಲಿ ಕಂಡುಬಂದಿತ್ತು. ಅಂತಾರಾಷ್ಟ್ರೀಯ ಪ್ರವಾಸ, ವಲಸೆ ಮತ್ತು ಕೀಟ ನಿಯಂತ್ರಣದಲ್ಲಿ ಬದಲಾವಣೆ ಅಭಿವೃದ್ಧಿ ಹೊಂದಿದ ರಾಷ್ಟ್ರಗಳಲ್ಲಿ ತಿಗಣೆಗಳ ಕಾಟ ಹೆಚ್ಚಲು ಕೊಡುಗೆ ಸಲ್ಲಿಸಿದೆ.