ಫ್ರಾನ್ಸ್ನ ಫ್ಲೈಟ್ ಎಎಫ್ 447 ವಿಮಾನ ಕೆಟ್ಟ ಹವಮಾನ ಪರಿಸ್ಥಿತಿಯಿಂದ ಅಟ್ಲಾಂಟಿಕ್ ಸಾಗರಕ್ಕೆ ಬಿದ್ದು ಅಪಘಾತಕ್ಕೀಡಾಯಿದೇ ಅಥವಾ ಬೇರೆ ಏನಾದರೂ ಸಂಭವಿಸಿದೆಯೇ? ಈ ಮುಂಚೆ ತಳ್ಳಿಹಾಕಲಾದ ಭಯೋತ್ಪಾದನೆ ದಾಳಿ ಸಾಧ್ಯತೆಯು ಈಗ ಮತ್ತೆ ಸುಳಿಯುತ್ತಿದೆ.
ಭಯೋತ್ಪಾದನೆ ದಾಳಿ ಸಾಧ್ಯತೆಯನ್ನು ತಾವು ತಳ್ಳಿಹಾಕಿಲ್ಲವೆಂದು ಫ್ರೆಂಚ್ ರಕ್ಷಣಾ ಸಚಿವರು ಹೇಳಿದ್ದಾರೆ. 228 ಜನರಿದ್ದ ವಿಮಾನ ಭಾನುವಾರ ಕಣ್ಮರೆಯಾದ ಬಳಿಕ ಅದರ ಅವಶೇಷಗಳನ್ನು ಹುಡುಕಲು ನಡೆಸಿದ ಅವಿರತ ಯತ್ನ ನಿಷ್ಫಲವಾಯಿತು. ಶೋಧನಾ ತಂಡ ಸರಿಯಾದ ಜಲಪ್ರದೇಶದಲ್ಲಿ ಹುಡುಕುತ್ತಿದೆಯೇ ಎನ್ನುವ ಸಂಶಯವೂ ಈಗ ಆವರಿಸಿದೆ.
ಜೆಟ್ ಅವಶೇಷ ಪತ್ತೆಹಚ್ಚಲು ಫ್ರೆಂಚ್ ನೌಕೆಯು ಪರಮಾಣು ಜಲಾಂತರ್ಗಾಮಿಯನ್ನು ಕಳಿಸುತ್ತಿದ್ದು ವಿಮಾನ ಹೇಗೆ ಅಪಘಾತಕ್ಕೆ ಈಡಾಯಿತೆಂಬುದು ತಜ್ಞರಿಗೆ ಒಗಟಾಗಿಯೇ ಉಳಿದಿದೆ. ದೊಡ್ಡ ಜೆಟ್ ವಿಮಾನಗಳಲ್ಲಿ ಹಾರಾಟದ ವೇಗದ ಮೇಲೆ ಪರಿಣಾಮ ಬೀರುವ ಉಪಕರಣಗಳನ್ನು ಬದಲಿಸಲು ಈ ನಡುವೆ ಏರ್ಫ್ರಾನ್ಸ್ ನಿರ್ಧರಿಸಿದೆ.
ಅಪಘಾತಕ್ಕೆ ಉಪಕರಣದ ಸಂಭವನೀಯ ಪಾತ್ರದ ಬಗ್ಗೆ ತನಿಖೆದಾರರು ಗಮನಹರಿಸಿದ್ದಾರೆ. ಇವೆಲ್ಲ ನಿಗೂಢತೆಗೂ ಉತ್ತರ ಕಪ್ಪುಪೆಟ್ಟಿಗೆಯಲ್ಲಿ ಹುದುಗಿದ್ದು, ಅದು ಸಿಗುವ ಬಗ್ಗೆ ಅಧಿಕಾರಿಗಳು ಶಂಕೆ ವ್ಯಕ್ತಪಡಿಸಿದ್ದಾರೆ. |