ದೀಪಾವಳಿ: ಸ್ಮಶಾನದಲ್ಲಿ ಮಧ್ಯರಾತ್ರಿ ಉಪಾಹಾರ! ರಾಜ್‌ಕೋಟ್, ಬುಧವಾರ, 7 ನವೆಂಬರ್ 2007( 12:11 IST )

ದೀಪಾವಳಿಗೆ ಮುನ್ನಾದಿನವಾದ "ಕಲಿ ಚತುರ್ದಶಿ"ಯಂದು ಮಧ್ಯರಾತ್ರಿ ಶವದಹನ ಕೇಂದ್ರದಲ್ಲಿ ಚಹಾ-ಕಾಫಿ ಸಹಿತ ಉಪಾಹಾರ ಕಾರ್ಯಕ್ರಮ ಏರ್ಪಡಿಸಲು ಭಾರತ ಜನ ವಿಜ್ಞಾನ ಜಾಥಾ ನಿರ್ಧರಿಸಿದೆ. ಈ ನಿರ್ದಿಷ್ಟ ದಿನದಂದು ಜನರು ಕುರುಡು ನಂಬಿಕೆಗಳಿಗೆ ಬಲಿಯಾಗಿ ವಿಚಿತ್ರ ಆಚರಣೆಗಳ ಬಗ್ಗೆ ಜನತೆಯ ಮನೋಭಾವವನ್ನು ಬದಲಿಸುವ ನಿಟ್ಟಿನಲ್ಲಿ, ಅಂಧಶ್ರದ್ಧೆ ಹೋಗಲಾಗಿಡುವ ನಿಟ್ಟಿನಲ್ಲಿ ಈ ಕಾರ್ಯಕ್ರಮ ಏರ್ಪಡಿಸಲಾಗಿದೆ. ದುಷ್ಟಶಕ್ತಿಗಳ ನಿಯಂತ್ರಣಕ್ಕಾಗಿ ಈ ನಿರ್ದಿಷ್ಟ ದಿನದಂದು ಮಧ್ಯರಾತ್ರಿ ಕಳೆದ ಬಳಿಕ ಸ್ಮಶಾನದಲ್ಲಿ ಮಂತ್ರವಾದಿಗಳ ಮೂಲಕ ಯಜ್ಞ ಮತ್ತು ಇತರ ವಿಧಿಗಳನ್ನು ಇಲ್ಲಿನ ಜನತೆ ನೆರವೇರಿಸುವ ಪದ್ಧತಿ ಇದೆ. ಈ ಕುರಿತು ಜನ ಜಾಗೃತಿ ನಡೆಸುವ ನಿಟ್ಟಿನಲ್ಲಿ ರಾಜ್ಯಮಟ್ಟದ ಈ ಕಾರ್ಯಕ್ರಮವು ಪೋರಬಂದರ್ ಸ್ಮಶಾನದಲ್ಲಿ ಗುರುವಾರ ನಡೆಯಲಿದೆ. ಸಮಾಜದ ಭೀತಿ ನಿವಾರಿಸುವುದೇ ಈ ಕಾರ್ಯಕ್ರಮದ ಮೂಲ ಉದ್ದೇಶ ಎಂದು ಭಾರತ ಜನವಿಜ್ಞಾನ ಜಾಥಾದ ಡಾ.ಜಯಂತ್ ಪಾಂಡ್ಯ ಅವರು ಪತ್ರಿಕಾ ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ. ಈ ರೀತಿಯ ಬಾಪುಗಳು, ಮೌಲ್ವಿಗಳು, ಮಾಂತ್ರಿಕರು ಸೇರಿಕೊಂಡು ಜನತೆಯ ದಾರಿ ತಪ್ಪಿಸುತ್ತಿದ್ದಾರೆ. ಈ ಮೂಲಕ ಜನರನ್ನು ಮಾನಸಿಕವಾಗಿ, ದೈಹಿಕವಾಗಿ ಮತ್ತು ಆರ್ಥಿಕವಾಗಿ ಸುಲಿಯುತ್ತಾರೆ. ಇದನ್ನು ತಪ್ಪಿಸುವುದೇ ನಮ್ಮ ಉದ್ದೇಶ ಎಂದು ಪ್ರಕಟಣೆಯಲ್ಲಿ ತಿಳಿಸಲಾಗಿದೆ.