ಕೋಮುಸಾಮರಸ್ಯ ಕೆಡಿಸುವುದು ಸ್ಫೋಟದ ಉದ್ದೇಶ ನವದೆಹಲಿ, ಶುಕ್ರವಾರ, 23 ನವೆಂಬರ್ 2007( 15:46 IST )

ಉತ್ತರಪ್ರದೇಶದಲ್ಲಿ ಕೋಮುಸಾಮರಸ್ಯವನ್ನು ಕೆಡಿಸುವುದು ಮತ್ತು ರಾಷ್ಟ್ರದ ಕಾನೂನು ವ್ಯವಸ್ಥೆಯನ್ನು ನಡುಗಿಸುವುದು ಸರಣಿ ಬಾಂಬ್ ಸ್ಫೋಟಗಳನ್ನು ನಡೆಸಿರುವುದರ ಉದ್ದೇಶ ಎಂದು ಕೇಂದ್ರ ಗೃಹ ಖಾತೆ ರಾಜ್ಯ ಸಚಿವ ಶ್ರೀಪ್ರಕಾಶ್ ಜೈಸ್ವಾಲ್ ಶುಕ್ರವಾರ ತಿಳಿಸಿದ್ದಾರೆ. ಈ ಸ್ಫೋಟದಲ್ಲಿ ಭಯೋತ್ಪಾದಕರ ಕೈವಾಡವನ್ನು ಅವರು ತಳ್ಳಿಹಾಕದಿದ್ದರೂ ಅದನ್ನಿನ್ನೂ ಖಚಿತಪಡಿಸಿಲ್ಲ. ಉತ್ತರಪ್ರದೇಶದಿಂದ ತಲುಪಿರುವ ಮಾಹಿತಿ ಪ್ರಕಾರ ಮೂರು ಸ್ಫೋಟಗಳು ಸಂಭವಿಸಿವೆ ಎಂದು ಅವರು ನುಡಿದರು.ಫೈಜಾಬಾದ್‌ನ್ನು ಅವಳಿ ಸ್ಫೋಟಗಳು ಅಪ್ಪಳಿಸಿವೆ ಎಂದು ಖಚಿತವಲ್ಲದ ವರದಿಗಳು ತಿಳಿಸಿವೆ. ಇದೊಂದು ಪೂರ್ವನಿಯೋಜಿತ ಸಂಚು ಎಂದು ಸಚಿವರು ಸ್ಫೋಟದ ಬಗ್ಗೆ ಪ್ರತಿಕ್ರಿಯಿಸಿದರು. ಈ ಘಟನೆ ಸಂಭವಿಸಿದ ಹಿನ್ನೆಲೆಯಲ್ಲಿ ಒಗ್ಗಟ್ಟಾಗಿ ಇರುವಂತೆ ಸ್ಪೋಟ ಪೀಡಿತ ರಾಜ್ಯ ಮತ್ತು ಇಡೀ ರಾಷ್ಟ್ರಕ್ಕೆ ಅವರು ಮನವಿ ಮಾಡಿಕೊಂಡರು. ಗುಪ್ತಚರ ವೈಫಲ್ಯದಿಂದ ಸ್ಫೋಟಗಳು ಸಂಭವಿಸಿದೆ ಎನ್ನುವುದನ್ನು ಸಚಿವರು ನಿರಾಕರಿಸಿದರು.