ರೈಲು ಎಂಜಿನ್‌ನಲ್ಲಿ ಬಾಂಬ್ ಸ್ಫೋಟ ಗುವಾಹಟಿ, ಮಂಗಳವಾರ, 4 ಡಿಸೆಂಬರ್ 2007( 16:59 IST )

ಪ್ರಯಾಣಿಕರ ರೈಲಿನ ಎಂಜಿನ್‌ನಲ್ಲಿ ಶಕ್ತಿಶಾಲಿ ಬಾಂಬ್ ಮಂಗಳವಾರ ಸ್ಫೋಟಿಸಿದ್ದು, ಬೋಗಿಗಳಿಗೆ ಹಾನಿಯಾಗದ್ದರಿಂದ ಪ್ರಮುಖ ಅವಘಡವೊಂದು ತಪ್ಪಿದಂತಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಕರ್ಬಿ ಆಂಗ್‌ಲಾಂಗ್‌ನ ಕಾಥ್‌ಕಾಟಿಯಲ್ಲಿ ಮಧ್ಯಾಹ್ನ 1.35ಕ್ಕೆ ಈ ಸ್ಫೋಟ ಸಂಭವಿಸಿದೆ ಎಂದು ರೈಲ್ವೆ ವಕ್ತಾರ ತಿಳಿಸಿದರು. ಕಾಮರೂಪ್ ಎಕ್ಸ್‌ಪ್ರೆಸ್‌ನ ಎಂಜಿನ್‌ಗೆ ಭಾಗಶಃ ಧಕ್ಕೆಯಾಗಿದ್ದರೂ, ಯಾವುದೇ ಸಾವು, ನೋವು ಸಂಭವಿಸಿಲ್ಲ ಎಂದು ರೈಲ್ವೆಯ ಮುಖ್ಯವಕ್ತಾರ ಟಿ. ರಾಭಾ ತಿಳಿಸಿದರು. ಸುಮಾರು 400 ಪ್ರಯಾಣಿಕರಿದ್ದ ರೈಲು ತಿನ್‌ಸುಕಿಯಾ ಕಡೆ ತೆರಳುತ್ತಿದ್ದಾಗ ಈ ಸ್ಫೋಟ ಸಂಭವಿಸಿದೆ. ಈ ಸ್ಫೋಟದಿಂದ ರೈಲುಹಳಿಗಳಿಗೆ ಹಾನಿಯಾಗಿಲ್ಲ. ನಾವು ಎಂಜಿನ್ ಬದಲಿಸಿದ ಬಳಿಕ 2 ಗಂಟೆಯಲ್ಲಿ ರೈಲು ಪ್ರಯಾಣ ಮುಂದುವರಿಸಿತು ಎಂದು ಅವರು ಹೇಳಿದರು. ಆದಿವಾಸಿ ಕರ್ಬಿ ಉಗ್ರಗಾಮಿಗಳ ಕೈವಾಡವನ್ನು ಪೊಲೀಸರು ಶಂಕಿಸಿದ್ದಾರೆ.