ಚಂದ್ರಯಾನ-2ಕ್ಕೆ ತಾಂತ್ರಿಕ ಚರ್ಚೆ ನವದೆಹಲಿ, ಮಂಗಳವಾರ, 18 ಡಿಸೆಂಬರ್ 2007( 20:36 IST )

ಜಂಟಿ ಚಂದ್ರಯಾತ್ರೆಯಾದ ಚಂದ್ರಯಾನ-2ರ ಸಲುವಾಗಿ ಭಾರತ ಮತ್ತು ರಷ್ಯಾ ತಾಂತ್ರಿಕ ಚರ್ಚೆಗಳನ್ನು ಆರಂಭಿಸಿದೆ. 2011-12ರಲ್ಲಿ ಆರಂಭವಾಗುವುದೆಂದು ನಿರೀಕ್ಷಿಸಲಾಗಿರುವ ಈ ಯೋಜನೆಯಲ್ಲಿ ವಿಜ್ಞಾನಿಗಳು ಚಂದ್ರನ ಮೇಲೆ ರೋವರ್ ಇಳಿಸಿ ಚಂದ್ರನ ಮೇಲ್ಮೈನ ರಾಸಾಯನಿಕ ವಿಶ್ಲೇಷಣೆ ನಡೆಸುವುದಲ್ಲದೇ ಭೂಮಿಯ ನಿಸರ್ಗದತ್ತ ಉಪಗ್ರಹವಾದ ಚಂದ್ರನ ಸಂಪನ್ಮೂಲಗಳನ್ನು ಶೋಧಿಸಲಿದ್ದಾರೆ. ರಾಸಾಯನಿಕ ವಿಶ್ಲೇಷಣೆ ಮತ್ತು ಸಂಪನ್ಮೂಲ ಶೋಧನೆ ಯೋಜನೆಯ ಮುಖ್ಯ ಉದ್ದೇಶ ಎಂದು ಚಂದ್ರಯಾನ-1ರ ಯೋಜನಾ ನಿರ್ದೇಶಕ ಮೈಲಾಸ್ವಾಮಿ ಅಣ್ಣಾದೊರೈ ಹೇಳಿದ್ದಾರೆ.ಚಂದ್ರಯಾನ 2ರ ತಾಂತ್ರಿಕ ಚರ್ಚೆಗಳಿಗಾಗಿ ಅಣ್ಣಾದೊರೈ ಕಳೆದ ತಿಂಗಳು ರಷ್ಯಾಗೆ ಭೇಟಿ ನೀಡಿದ್ದರು. 2008 ಏಪ್ರಿಲ್ 9ರಂದು ಆರಂಭವಾಗುವ ಚಂದ್ರಯಾನ-1 ಯೋಜನೆಗಿಂತ ಇದು ಅಲ್ಪಾವಧಿಯ ಯಾತ್ರೆಯೆಂದು ನಿರೀಕ್ಷಿಸಲಾಗಿದೆ. ರೆಫ್ರಿಜಿರೇಟರ್‌ನಲ್ಲಿ ಬಳಸುವ ಹೀಲಿಯಂ 3 ಅನಿಲವನ್ನು ಹೊಂದಿದ ಖನಿಜ ಮಾದರಿಗಳು ಮತ್ತು ಇಂಧನ ಕೊರತೆ ನೀಗಿಸುವ ಅನಿಲಗಳಿಗಾಗಿ ಕೂಡ ಚಂದ್ರಯಾನ 2ರಲ್ಲಿ ಶೋಧ ಮಾಡಲಾಗುವುದು ಎಂದು ನಂಬಲಾಗಿದೆ.