ಗುಜರಾತ್ ಸೋಲಿಗೆ ಸೋನಿಯಾ ಹೊಣೆಯಲ್ಲ: ಕಾಂಗ್ರೆಸ್ ನವದೆಹಲಿ, ಮಂಗಳವಾರ, 25 ಡಿಸೆಂಬರ್ 2007( 10:37 IST )

ಗುಜರಾತ್ ಅಸೆಂಬ್ಲಿ ಚುನಾವಣೆಗಳಲ್ಲಿ ನಿರೀಕ್ಷೆ ಮೀರಿ ಸೋಲು ಕಂಡಿರುವ ಕಾಂಗ್ರೆಸ್ ಆತ್ಮಾವಲೋಕನ ಮಾಡಿಕೊಳ್ಳುತ್ತಿದ್ದರೆ, ಅದಕ್ಕೆ ಒಂದರ ಬಗ್ಗೆ ಮಾತ್ರ ಖಚಿತ ನಿಲುವಿದೆ. ಅದೆಂದರೆ, ಇಲ್ಲಿ ಕಾಂಗ್ರೆಸ್ ಅಧ್ಯಕ್ಷೆ ಸೋನಿಯಾ ಗಾಂಧಿಯವರದೇನೂ ಪಾತ್ರವಿಲ್ಲ, ಯಾವುದೇ ತಪ್ಪೂ ಇಲ್ಲ. ಸೋನಿಯಾ ಗಾಂಧಿಯ ಸಮಾವೇಶಗಳಿಗೆ ಮತ್ತು ರಾಹುಲ್ ಗಾಂಧಿಯ ರೋಡ್ ಶೋಗಳಿಗೆ ಬಂದಿದ್ದ ಜನಸಾಗರವೆಲ್ಲವೂ ಮತಗಳಾಗಿ ಪರಿವರ್ತನೆಯಾಗುತ್ತವೆ, ತಮಗೆ ಜಯ ಕಟ್ಟಿಟ್ಟ ಬುತ್ತಿ ಎಂಬ ಆಶಾವಾದವನ್ನು ಕಾಂಗ್ರೆಸ್ ಹೊಂದಿತ್ತು. ಆದರೆ ಜನರನ್ನು ಆಕರ್ಷಿಸುವವರು ಮತಗಳನ್ನು ಆಕರ್ಷಿಸುವಲ್ಲಿ ವಿಫಲರಾದರು, ಹೀಗಾಗಿ ಸೋನಿಯಾ ಅವರ ಪಕ್ಷವು ತಪ್ಪು ತನ್ನದೇ, ಸೋನಿಯಾ ಗಾಂಧಿಯದೇನಿಲ್ಲ ಎಂದು ಹೇಳಿಕೊಳ್ಳುತ್ತಿದೆ. ಜನಸಾಗರವನ್ನು ಮತಗಳಾಗಿ ಪರಿವರ್ತಿಸುವಲ್ಲಿ ನಾವು ಎಡವಿದೆವು. ಆಕೆಯನ್ನೇಕೆ ದೂಷಿಸಬೇಕು ಎಂದು ಗುಜರಾತ್ ಕಾಂಗ್ರೆಸ್ ಉಸ್ತುವಾರಿ ವಹಿಸಿರುವ ಎಐಸಿಸಿ ಪ್ರಧಾನ ಕಾರ್ಯದರ್ಶಿ ಬಿ.ಕೆ.ಹರಿಪ್ರಸಾದ್ ಅವರು ಸಿಎನ್ಎನ್ ಐಬಿಎನ್‌ಗೆ ತಿಳಿಸಿದ್ದಾರೆ.