ಹೊಸ ವರ್ಷದ ಸಂಭ್ರಮ ತಂದ ಕುತ್ತು ಮಂಗಳವಾರ, 1 ಜನವರಿ 2008( 15:49 IST )

ಹೊಸ ವರ್ಷದ ಸಡಗರ ಸಾಫ್ಟ್‌ವೇರ್ ಉದ್ಯೋಗಿಯೊಬ್ಬರಿಗೆ ಮಾರಣಾಂತಿಕವಾಗಿ ಪರಿಣಮಿಸಿದ ಘಟನೆ ನಡೆದಿದೆ. ಹೊಸ ವರ್ಷದ ಆಚರಣೆಗಾಗಿ ನಗರದ ಹೊಟೆಲ್‌ವೊಂದರಲ್ಲಿ ಈಜುವ ಕೊಳದ ಮೇಲ್ಬಾಗದಲ್ಲಿ ಹಾಕಿದ್ದ ತಾತ್ಕಾಲಿಕ ವೇದಿಕೆ ಸೋಮವಾರ ರಾತ್ರಿ ಕುಸಿದುಬಿದ್ದು, ಸಾಫ್ಟ್‌ವೇರ್ ಉದ್ಯೋಗಿ ಅಸುನೀಗಿದ್ದಾರೆ ಮತ್ತು 30ಕ್ಕೂ ಹೆಚ್ಚು ಮಂದಿ ಗಾಯಗೊಂಡಿದ್ದಾರೆ. ಈ ವೇದಿಕೆ ಹಠಾತ್ತನೆ ಕುಸಿದುಬಿದ್ದು, ಅದರ ಮೇಲೆ ಹೊಸ ವರ್ಷದ ಸಂಭ್ರಮದಲ್ಲಿ ನೃತ್ಯ ಮಾಡುತ್ತಿದ್ದವರು ಕೊಳದೊಳಕ್ಕೆ ಬಿದ್ದರೆಂದು ಪೊಲೀಸರು ತಿಳಿಸಿದ್ದಾರೆ. ಸುಮಿತ್ ಅಗ್ನಿಹೋತ್ರಿ(24ವರ್ಷ) ಜನರಲ್ ಆಸ್ಪತ್ರೆಯಲ್ಲಿ ಮಂಗಳವಾರ ಮುಂಜಾನೆ ಅಸುನೀಗಿದ್ದಾರೆಂದು ಪೊಲೀಸರು ತಿಳಿಸಿದ್ದು, ಇನ್ನೂ ಇಬ್ಬರ ಸ್ಥಿತಿ ಚಿಂತಾಜನಕವಾಗಿದೆ ಎಂದು ಪೊಲೀಸ್ ಮೂಲಗಳು ಹೇಳಿವೆ. ಹೊಟೆಲ್ ಅಧಿಕಾರಿಗಳ ವಿರುದ್ಧ ಮೊಕದ್ದಮೆ ದಾಖಲಿಸಲಾಗಿದೆ ಎಂದೂ ಅವರು ಹೇಳಿದ್ದಾರೆ.