ರಾಮಸೇತು: ಹೊಸ ಪ್ರಮಾಣಪತ್ರಕ್ಕೆ ಚರ್ಚೆ ನವದೆಹಲಿ, ಶನಿವಾರ, 5 ಜನವರಿ 2008( 20:42 IST )

ರಾಮಸೇತು ವಿಷಯದ ಬಗ್ಗೆ ಸುಪ್ರೀಂಕೋರ್ಟ್‌ನಲ್ಲಿ ಹೊಸ ಪ್ರಮಾಣಪತ್ರ ಸಲ್ಲಿಸುವ ಬಗ್ಗೆ ಕೇಂದ್ರ ಸಾಂಸ್ಕತಿಕ ಸಚಿವೆ ಅಂಬಿಕಾ ಸೋನಿ ಅವರು ಪ್ರಧಾನಿ ಮನಮೋಹನ ಸಿಂಗ್ ಜತೆ ಚರ್ಚಿಸಿದರೆಂದು ಗೊತ್ತಾಗಿದೆ. ಸೋನಿ ಅವರು ಶುಕ್ರವಾರ ಪ್ರಧಾನಿ ಅವರನ್ನು ಭೇಟಿ ಮಾಡಿ ರಾಮಸೇತು ವಿಷಯ ಬಗ್ಗೆ ಹೊಸ ಪ್ರಮಾಣ ಪತ್ರ ಸಲ್ಲಿಸುವ ಬಗ್ಗೆ ವಿವರ ನೀಡಿದರೆಂದು ಸಂಸ್ಕೃತಿ ಸಚಿವಾಲಯದ ಮೂಲಗಳು ತಿಳಿಸಿವೆ. ಸೇತುಸಮುದ್ರಂ ಬಗ್ಗೆ ಕಳೆದ ಸೆಪ್ಟೆಂಬ‌ರ್‌ನಲ್ಲಿ ಸಲ್ಲಿಸಿದ ಪ್ರಮಾಣಪತ್ರದಲ್ಲಿ ರಾಮನ ಅಸ್ತಿತ್ವವನ್ನೇ ಪುರಾತತ್ವ ಇಲಾಖೆ ಪ್ರಶ್ನಿಸಿದ್ದರಿಂದ ಸಚಿವೆ ಮುಜುಗರಕ್ಕೆ ಒಳಗಾಗಿದ್ದರು. ಹಿಂದೂ ಸಂಘಟನೆಗಳ ಬಲವಾದ ಪ್ರತಿಭಟನೆ ಬಳಿಕ ಪ್ರಮಾಣಪತ್ರವನ್ನು ಹಿಂತೆಗೆದುಕೊಳ್ಳಲಾಗಿತ್ತು, ಹೊಸ ಪ್ರಮಾಣಪತ್ರವನ್ನು ಎಚ್ಚರಿಕೆಯ ಹೆಜ್ಜೆಯಿಂದ ರೂಪಿಸಲಾಗಿದ್ದು ಎನ್‌ಡಿಎ ಆಡಳಿತಾವಧಿಯಲ್ಲಿ ಯೋಜನೆ ಮೊಳಕೆಯೊಡೆಯಿತೆಂದು ಪ್ರಸ್ತಾಪಿಸಲಾಗಿದೆ.