ಭಾರತ-ಚೀನಾ ವ್ಯಾವಹಾರಿಕ ಅಡಚಣೆ ನಿವಾರಣೆಗೆ ಕ್ರಮ: ಸಿಂಗ್ ಬೀಜಿಂಗ್, ಸೋಮವಾರ, 14 ಜನವರಿ 2008( 10:53 IST )

ಹೆಚ್ಚು ಮಹತ್ವಾಕಾಂಕ್ಷೆಯ ದ್ವಿಪಕ್ಷೀಯ ವ್ಯಾವಹಾರಿಕ ಗುರಿ ಪ್ರಸ್ತಾಪಿಸಿರುವ ಪ್ರಧಾನಿ ಮನಮೋಹನ್ ಸಿಂಗ್, ಆಡಳಿತಾತ್ಮಕ ಅಡ್ಡಿ ನಿವಾರಣೆಗೆ ಮತ್ತು ಸೇವಾ ವಲಯದಲ್ಲಿ ವ್ಯವಹಾರ ವಿಸ್ತರಣೆಗಾಗಿ ನಿಬಂಧನೆಗಳನ್ನು ಸಡಿಲಗೊಳಿಸಲು ಭಾರತವು ಚೀನಾದ ಜೊತೆ ಶ್ರಮಿಸಲಿದೆ ಎಂದು ತಿಳಿಸಿದ್ದಾರೆ. ಏಷ್ಯಾದ ಆರ್ಥಿಕ ಬಲವರ್ಧನೆ ಮತ್ತು ಏಕೀಕರಣಕ್ಕೆ ಶ್ರಮಿಸಿ ಅದರಿಂದ ಸೂಕ್ತ ಲಾಭ ದೊರೆಯುವಂತಾಗಲು ಉಭಯ ರಾಷ್ಟ್ರಗಳೂ ಕಾರ್ಯತತ್ಪರವಾಗಲಿವೆ ಎಂದು ಭಾರತ ಮತ್ತು ಚೀನಾ ಉದ್ಯಮಿಗಳು ಹಾಗೂ ವ್ಯವಹಾರೋದ್ಯಮಿಗಳ ಔದ್ಯಮಿಕ ಸಮಾವೇಶದಲ್ಲಿ ಸೋಮವಾರ ಮಾತನಾಡುತ್ತಿದ್ದ ಚೀನಾ ಪ್ರವಾಸದಲ್ಲಿರುವ ಪ್ರಧಾನಿ ನುಡಿದರು. ನಮ್ಮ ಎರಡು ಆರ್ಥಿಕತೆಗಳು ಆರ್ಥಿಕ ಬೆಳವಣಿಗೆಯ ಎಂಜಿನ್‌ಗಳಂತಾಗುತ್ತಿವೆ. ನಾವು ನಮ್ಮ ನೈಸರ್ಗಿಕ ಮತ್ತು ಮಾನವ ಸಂಪನ್ಮೂಲಗಳು, ತಂತ್ರಜ್ಞಾನ ಮತ್ತು ಬಂಡವಾಳವನ್ನು ಈ ಪ್ರದೇಶದ ಸಮಾನ ಅಭಿವೃದ್ಧಿಗೆ ಬಳಸಿಕೊಳ್ಳಬೇಕಾಗಿದೆ ಎಂದು ಭಾರತ-ಚೀನಾ ಆರ್ಥಿಕ, ಔದ್ಯಮಿಕ ಮತ್ತು ಬಂಡವಾಳ ಸಮಾವೇಶದಲ್ಲಿ ಮಾತನಾಡುತ್ತಾ ಹೇಳಿದರು. ಕಳೆದ ಎರಡು ವರ್ಷಗಳಲ್ಲಿ ಚೀನಾ ಜತೆಗಿನ ದ್ವಿಪಕ್ಷೀಯ ವ್ಯವಹಾರವು ದುಪ್ಪಟ್ಟು ವೃದ್ಧಿಸಿದೆ ಎಂದು ತಿಳಿಸಿರುವ ತ್ರಿದಿನ ಚೀನಾ ಪ್ರವಾಸದಲ್ಲಿರುವ ಪ್ರಧಾನಿ ಸಿಂಗ್, 2008ರೊಳಗೆ 20 ಶತಕೋಟಿ ಡಾಲರ್ ವ್ಯಾವಹಾರಿಕ ಗುರಿಯನ್ನು ಎರಡು ವರ್ಷಗಳ ಮುನ್ನವೇ ಸಾಧಿಸಲಾಗಿದೆ. ಅಂತೆಯೇ 2010ರೊಳಗೆ ವ್ಯವಹಾರವು 40 ಶತಕೋಟಿ ಡಾಲರ್ ತಲುಪಬೇಕೆಂಬ ಪುನಾರಚಿತ ಗುರಿಯನ್ನೂ ಎರಡು ವರ್ಷ ಮುನ್ನವೇ ತಲುಪಲಿದ್ದೇವೆ ಎಂಬ ವಿಶ್ವಾಸ ವ್ಯಕ್ತಪಡಿಸಿದರು.