ಜಲ್ಲಿಕಟ್ಟು ಆಟದಲ್ಲಿ 129 ಜನರಿಗೆ ಗಾಯ ತಮಿಳುನಾಡು, ಗುರುವಾರ, 17 ಜನವರಿ 2008( 19:49 IST )

ಗೂಳಿಗಳನ್ನು ಪಳಗಿಸುವ ಸಾಂಪ್ರದಾಯಿಕ ಕ್ರೀಡೆ ಬುಧವಾರ ಎರಡು ಸ್ಥಳಗಳಲ್ಲಿ ಜರುಗಿದ್ದು, ಗೂಳಿಗಳ ದಾಂಧಲೆಗೆ ಸಿಕ್ಕಿ ಕನಿಷ್ಠ 129 ಜನರು ಗಾಯಗೊಂಡಿದ್ದಾರೆ. ಈ ಆಟವು ನೂರಾರು ಸ್ಪರ್ಧಿಗಳನ್ನು ಮತ್ತು ಪ್ರೇಕ್ಷಕರನ್ನು ನೆರೆಯ ಜಿಲ್ಲೆಗಳಿಂದಲೂ ಆಕರ್ಷಿಸಿತ್ತು. ಗೂಳಿಗಳ ಡುಬ್ಬವನ್ನು ಹಿಡಿದು ಮಣಿಸಲು ಅವಕಾಶ ನೀಡಿದ 350 ಸ್ಪರ್ಧಿಗಳಲ್ಲಿ 80 ಜನರು ಗಾಯಗೊಂಡಿದ್ದು, ಅವರಲ್ಲಿ 14 ಜನರು ಗಂಭೀರವಾಗಿ ಗಾಯಗೊಂಡಿದ್ದಾರೆ ಎಂದು ಪೊಲೀಸರು ತಿಳಿಸಿದ್ದಾರೆ. ಗೂಳಿಗಳನ್ನು ಮಣಿಸುವ ಕ್ರಿಯೆಯಲ್ಲಿ ಅವುಗಳ ತಿವಿತದಿಂದ ಅಥವಾ ಗೂಳಿಗಳ ಸೆಣೆಸಾಟಕ್ಕೆ ಆಯತಪ್ಪಿ ಕೆಳಕ್ಕೆ ಬಿದ್ದು ಗಾಯಗೊಂಡಿದ್ದಾರೆ ಎಂದು ಅವರು ಹೇಳಿದರು. ಇಂದಿನ ಕ್ರೀಡೆಯನ್ನು ಉನ್ನತ ಪೊಲೀಸ್ ಅಧಿಕಾರಿಗಳು ಮತ್ತು ಜಿಲ್ಲಾಧಿಕಾರಿಗಳ ನೇರ ಮೇಲ್ವಿಚಾರಣೆಯಲ್ಲಿ ನಡೆಸಲಾಯಿತು. ಪ್ರತಿವರ್ಷ ಗೂಳಿಯನ್ನು ಪಳಗಿಸುವ ಕ್ರಿಯೆಯಲ್ಲಿ ಅನೇಕ ಮಂದಿ ಅಸುನೀಗಿದ್ದರು ಮತ್ತು ಗಾಯಗೊಂಡಿದ್ದರು. ಈ ಬಾರಿ 500 ಗೂಳಿಗಳು ಮತ್ತು 350 ಜನರು ಸ್ಪರ್ಧೆಯಲ್ಲಿ ಪಾಲ್ಗೊಂಡಿದ್ದರು. ಮುಖ್ಯವಾದ ಜಲ್ಲಿಕಟ್ಟು ಆಚರಣೆಯು ಇಲ್ಲಿನ ಅಲಂಗನಲ್ಲೂರಿನಲ್ಲಿ ಶುಕ್ರವಾರ ನಡೆಯಲಿದ್ದು, ವಿದೇಶಿ ಪ್ರವಾಸಿಗಳು ಕೂಡ ಬರುವರೆಂದು ನಿರೀಕ್ಷಿಸಲಾಗಿದೆ.