ತಸ್ಲಿಮಾ ವೀಸಾ ಅವಧಿ ಮುಂದರಿಕೆ ನವದೆಹಲಿ , ಶುಕ್ರವಾರ, 15 ಫೆಬ್ರವರಿ 2008( 10:46 IST )

PTI ಸರಕಾರದ ಆಶ್ರದಲ್ಲಿರುವ ಬಾಂಗ್ಲಾದೇಶದ ವಿವಾದಾಸ್ಪದ ಲೇಖಕಿ ತಸ್ಲಿಮಾ ನಸ್ರೀನ್ ಅವರ ವೀಸಾ ಅವಧಿಯನ್ನು ವಿಸ್ತರಿಸಲು ಕೇಂದ್ರ ಸರಕಾರ ಗುರವಾರ ತಡರಾತ್ರಿ ನಿರ್ಧರಿಸಿದೆ. ತಸ್ಲಿಮಾ ಅವರು ಭಾರತೀಯ ಸಂಪ್ರದಾಯಗಳ ಕುರಿತು ಸೂಕ್ಷ್ಮವಾಗಿರಬೇಕು ಮತ್ತು ಭಾರತದ ಜಾತ್ಯತೀತ ಭಾವನೆಗಳಿಗೆ ನೋವುಂಟು ಮಾಡಬಾರದು ಎಂಬ ಎಚ್ಚರಿಕೆಯೊಂದಿಗೆ ಸರಕಾರ ಈ ನಿರ್ಧಾರಕ್ಕೆ ಬಂದಿದೆ. ಭಾರತದ ಇತಿಹಾಸದುದ್ದಕ್ಕೂ ಆಶ್ರಯ ಯಾಚಿಸಿದವರಿಗೆ ಆತಿಥ್ಯ ನೀಡಿದ ಸಂಪ್ರದಾಯವಿದೆ ಎಂದು ವಿದೇಶಾಂಗ ವ್ಯವಹಾರಗಳ ವಕ್ತಾರ ನವತೇಜ್ ಸರ್ನಾ ಹೇಳಿದ್ದಾರೆ. ಅತಿಥಿಗಳಾಗಿ ಬಂದವರಿಗೆ ಭಾರತವು ರಕ್ಷಣೆಯನ್ನೂ ನೀಡಿದೆ. ತಸ್ಲಿಮಾ ನಸ್ರೀನ್ ನಮ್ಮ ಅತಿಥಿ. ನಮ್ಮ ಸಂಪ್ರದಾಯಗಳನ್ನು ಗಮನದಲ್ಲಿರಿಸಿಕೊಂಡು ಅದೇ ಸವಲತ್ತುಗಳನ್ನು ಅವರಿಗೆ ನೀಡಿದ್ದೇವೆ ಎಂದು ಅವರು ಹೇಳಿದರು.