ಆಂಧ್ರ: 19 ಟಿಆರ್‍ಎಸ್ ಸದಸ್ಯರ ರಾಜೀನಾಮೆ ಹೈದರಾಬಾದ್, ಮಂಗಳವಾರ, 4 ಮಾರ್ಚ್ 2008( 16:26 IST )

ತೆಲಂಗಾಣ ರಾಷ್ಟ್ರ ಸಮಿತಿ ಅಧ್ಯಕ್ಷ ಕೆ.ಚಂದ್ರಶೇಖರ ರಾವ್ ತನ್ನ ಲೋಕಸಭಾ ಸದಸ್ಯತ್ವಕ್ಕೆ ರಾಜೀನಾಮೆ ನೀಡಿದ ಒಂದು ದಿವಸದ ಬಳಿಕ, ಪಕ್ಷದ 16 ವಿಧಾನ ಸಭಾ ಸದಸ್ಯರು ಮತ್ತು ಮೂರು ವಿಧಾನ ಪರಿಷತ್ ಸದಸ್ಯರು ಮಂಗಳವಾರ ಆಂಧ್ರ ವಿಧಾಸಭೆಗೆ ರಾಜೀನಾಮೆ ನೀಡಿದ್ದಾರೆ. ಕಾಂಗ್ರೆಸ್ ನೇತೃತ್ವದ ಯುಪಿಎ ಸರಕಾರವು ತೆಲಂಗಾಣಕ್ಕೆ ಪ್ರತ್ಯೇಕ ರಾಜ್ಯದ ಸ್ಥಾನಮಾನ ನೀಡುವಲ್ಲಿ ಅನವಶ್ಯ ವಿಳಂಬ ನೀತಿ ಅನುಸರಿಸುತ್ತಿದೆ ಎಂದು ಆರೋಪಿಸಿರುವ ಟಿಆರ್ಎಸ್, ಇದನ್ನು ಪ್ರತಿಭಟಿಸಿ ರಾಜೀನಾಮೆ ನೀಡಿರುವುದಾಗಿ ಹೇಳಿದೆ. ಕಾಂಗ್ರೆಸ್ ತೆಲಂಗಾಣಕ್ಕೆ ಕೈಕೊಟ್ಟಿದೆ ಎಂದು ದೂರಿರುವ 16 ಶಾಸಕರು ತಮ್ಮ ರಾಜೀನಾಮೆ ಪತ್ರವನ್ನು ವಿಧಾನ ಸಭಾ ಸ್ಪೀಕರ್ ಕೆ.ಅರ್ ಸುರೇಶ್ ರೆಡ್ಡಿ ಅವರಿಗೆ ನೀಡಿದ್ದರೆ, ಮೂವರು ಮೇಲ್ಮನೆ ಸದಸ್ಯರು ವಿಧಾನ ಮಂಡಳಿ ಅಧ್ಯಕ್ಷ ಕೆ. ಚಕ್ರಪಾಣಿಯವರಿಗೆ ತಮ್ಮ ರಾಜೀನಾಮೆ ಸಲ್ಲಿಸಿದ್ದಾರೆ.