ಬಿಹಾರದ 8 ಮಂತ್ರಿಗಳಿಗೆ ಅರ್ಧಚಂದ್ರ ನವದೆಹಲಿ, ಭಾನುವಾರ, 13 ಏಪ್ರಿಲ್ 2008( 17:41 IST )

PIB ಉತ್ತಮ ಕಾರ್ಯಕ್ಷಮತೆ ತೋರದ ಎಂಟು ಸಚಿವರಿಗೆ ರಾಜೀನಾಮೆ ನೀಡಲು ಬಿಹಾರ ಮುಖ್ಯಮಂತ್ರಿ ನಿತೀಶ್ ಕುಮಾರ್ ಒತ್ತಾಯಿಸಿರುವುದಾಗಿ ಅಧಿಕೃತ ಮೂಲಗಳು ಹೇಳಿವೆ. ತನ್ನ ಮಂತ್ರಿಮಂಡಲ ವಿಸ್ತರಣೆಯ ಹಿನ್ನೆಲೆಯಲ್ಲಿ, ಎಂಟು ಸಚಿವರಿಗೆ ರಾಜೀನಾಮೆ ಸಲ್ಲಿಸಲು ಶನಿವಾರ ರಾತ್ರಿ ಹೇಳಿರುವುದಾಗಿ ಮೂಲಗಳು ತಿಳಿಸಿವೆ. ಬಿಹಾರದ ಮುಖ್ಯಮಂತ್ರಿಯಾಗಿ ಅಧಿಕಾರ ವಹಿಸಿಕೊಂಡಂದಿನಿಂದ ತನ್ನ ಸರಕಾರದ ಉತ್ತಮ ಇಮೇಜ್ ಪ್ರತಿಬಿಂಬಿಸಲು ಯತ್ನಿಸುತ್ತಿರುವ ನಿತೀಶ್, ಮೊನಜೀರ್ ಹಸನ್, ರಾಮೇಶ್ವರ್ ಪಾಸ್ವಾನ್, ಬೈದನಾಥ್ ಮಹತೊ. ಅರ್ಜುನ್ ರೈ. ಮಂಜರ್ ಅಲಮ್, ವಿಶ್ವಮೋಹನ್ ಕುಮಾರ್, ಅಜಿತ್ ಕುಮಾರ್ ಮತ್ತು ಸುಚಿತ್ರ ಸಿನ್ಹಾ ಅವರುಗಳು ಸಂಪುಟ ತೊರೆಯುವಂತೆ ಹುಕುಂ ಮಾಡಿದ್ದಾರೆ. ನವೆಂಬರ್ 2005ರಲ್ಲಿ ಸರಕಾರ ಅಸ್ತಿತ್ವಕ್ಕೆ ಬಂದಿರುವ ಎನ್‌ಡಿಎ ಸರಕಾರದ ಪ್ರಥಮ ವಿಸ್ತರಣೆ ಇದಾಗಿದ್ದು, ಹೊಸ ಮುಖಗಳ ಸೇರ್ಪಡೆ ನಿರೀಕ್ಷಿಸಲಾಗಿದೆ. ಮಂಗಳವಾರ ಅಥವಾ ಬುಧವಾರ ವಿಸ್ತರಣೆ ನಡೆಯಲಿದೆ ಎಂದು ಮೂಲಗಳು ಹೇಳಿವೆ. ಬಿಜೆಪಿ ಪಕ್ಷದ ಮಂತ್ರಿಗಳು ತಮ್ಮ ರಾಜೀನಾಮೆಯನ್ನು ಉಪಮುಖ್ಯಮಂತ್ರಿ ಸುಶಿಲ್ ಕುಮಾರ್ ಮೋದಿಯವರಿಗೆ ಸಲ್ಲಿಸಿದರೆ, ಜೆಡಿ-ಯು ಮಂತ್ರಿಗಳು ನಿತೀಶ್ ಕುಮಾರ್ ಅವರಿಗೆ ತಮ್ಮ ರಾಜೀನಾಮೆ ಸಲ್ಲಿಸಲಿದ್ದಾರೆ.