ಬೆಲೆ ಏರಿಕೆ ವಿರೋಧಿಸಿ ಸಂಸದರ ಮಾನವ ಸರಪಣಿ ನವದೆಹಲಿ, ಗುರುವಾರ, 24 ಏಪ್ರಿಲ್ 2008( 13:22 IST )

ಬೆಲೆ ಏರಿಕೆಯನ್ನು ತಡೆಯುವಲ್ಲಿ ಕೇಂದ್ರ ಸರಕಾರದ 'ವೈಫಲ್ಯ'ವನ್ನು ಪ್ರತಿಭಟಿಸಿ ಹಿರಿಯ ಬಿಜೆಪಿ ನಾಯಕ ಎಲ್.ಕೆ.ಆಡ್ವಾಣಿ ನೇತೃತ್ವದಲ್ಲಿ, ಎನ್‌ಡಿಎ ಸಂಸದರು ಸಂಸತ್ ಭವನದ ಸಂಕೀರ್ಣದಲ್ಲಿ ಮಾನವ ಸರಪಣಿ ನಿರ್ಮಿಸಿದರು. ಯುಪಿಎ ಸರಕಾರದ ಆರ್ಥಿಕ ನೀತಿಗಳ ವಿರೋಧದ ಪ್ರದರ್ಶನಕ್ಕಾಗಿ ಮಹಾತ್ಮಾ ಗಾಂಧಿ ಪ್ರತಿಮೆಯ ಬಳಿ ಪ್ರತಿಭಟನೆ ನಡೆಸಿದ ಬಿಜೆಪಿ, ಜೆಡಿ(ಯು), ಬಿಜೆಡಿ ಮತ್ತು ಅಕಾಲಿ ದಳದ ಸಂಸದರು ಸರಕಾರದ ವಿರುದ್ಧ ಘೋಷಣೆಗಳನ್ನು ಕೂಗಿದರು. ವಿರೋಧ ಪಕ್ಷವು ಇದೀಗಾಗಲೆ ಮೇ 2ರಂದು ಮುಷ್ಕರಕ್ಕೆ ಕರೆ ನೀಡಿದೆ. "ಕಾಂಗ್ರೆಸ್ ಅಧಿಕಾರಕ್ಕೆ ಬಂದಾಗಲೆಲ್ಲ ಅಗತ್ಯವಸ್ತುಗಳ ಬೆಲೆ ಏರಿದೆ. ಬೆಲೆ ಏರಿಕೆ ತಡೆಯುವಲ್ಲಿ ಸರಕಾರ ಸಂಪೂರ್ಣ ವಿಫಲವಾಗಿದೆ" ಎಂದು ಬಿಜೆಪಿ ಅಧ್ಯಕ್ಷ ರಾಜ್‌ನಾಥ್ ಸಿಂಗ್ ದೂರಿದ್ದಾರೆ. 'ಬೆಲೆ ಏರಿಕೆಗೆ ಕಾಂಗ್ರೆಸ್, ಕಮ್ಯುನಿಸ್ಟ್ ಕಾರಣ', 'ಬೆಲೆಏರಿಕೆ ತಡೆಯಿರಿ ಇಲ್ಲ ತೊಲಗಿರಿ' ಮುಂತಾದ ಘೋಷಣೆಗಳುಳ್ಳ ಬ್ಯಾನರುಗಳನ್ನು ಸಂಸದರು ಪ್ರದರ್ಶಿಸಿದರು. ಸಂಸದರಾದ ಜಸ್ವಂತ್ ಸಿಂಗ್, ಸುಷ್ಮಾ ಸ್ವರಾಜ್, ವಿ.ಕೆ.ಮಲ್ಹೋತ್ರಾ, ಹೇಮಮಾಲಿನಿ, ಜಾರ್ಜ್ ಫೆರ್ನಾಂಡಿಸ್, ಶರದ್ ಯಾದವ್, ಮತ್ತು ಶಿವಸೇನಾ ನಾಯಕ ಮನೋಹರ್ ಜೋಷಿ ಪ್ರತಿಭಟನೆಯಲ್ಲಿ ಭಾಗವಹಿಸಿದ್ದರು.