ನ್ಯಾಯಾಂಗ ನಿಂದನೆ ರದ್ದತಿ ಅಸಾಧ್ಯ: ಸಿಜೆ ಶನಿವಾರ, 26 ಏಪ್ರಿಲ್ 2008( 18:51 IST )

ತಿರುನಂತಪುರಂ : ನ್ಯಾಯಾಂಗ ನಿಂದನೆ ನಿಬಂಧನೆಗಳು ಇಲ್ಲದಿದ್ದರೆ ನ್ಯಾಯಾಂಗ ಆದೇಶಗಳು ಕೇವಲ ಕಾಗದಗಳ ಕಂತೆಯಾಗಲಿದೆ ಮತ್ತು ಕಾರ್ಯನಿರ್ವಾಹಕ ಅಧಿಕಾರಿಗಳು ನ್ಯಾಯಾಲಯದ ತೀರ್ಪನ್ನು ಪಾಲಿಸುವುದಿಲ್ಲ ಎಂದು ಮುಖ್ಯ ನ್ಯಾಯಮೂರ್ತಿ ಕೆ.ಜಿ. ಬಾಲಕೃಷ್ಣನ್ ಹೇಳಿದ್ದಾರೆ. "ನ್ಯಾಯಾಂಗ ನಿಂದನೆಯ ನಿಬಂಧನೆಗಳನ್ನು ತೆಗೆದು ಹಾಕಿದರೆ ನ್ಯಾಯಾಲಯ ತೀರ್ಪನ್ನು ಯಾರು ಪಾಲಿಸುತ್ತಾರೆ" ಎಂದು ಪ್ರಶ್ನಿಸಿದ ಅವರು, ಅದಿಲ್ಲದಿದ್ದರೆ ನ್ಯಾಯಾಂಗ ಆದೇಶಗಳು ಕೇವಲ ಕಾಗದಗಳ ಕಂತೆಯಾಗೇ ಉಳಿಯುವುದು ಎಂದು ಹೇಳಿದ್ದಾರೆ. ಕೇರಳ ವಿಧಾನ ಸಭೆ ಸುವರ್ಣ ಮಹೋತ್ಸವ ಸಮಾರಂಭದ ಭಾಗವಾಗಿ ನಡೆದ ಕಾರ್ಯಾಂಗ, ಶಾಸಕಾಂಗ, ನ್ಯಾಯಾಂಗ ನಡುವಿನ ಸಂಬಂಧ ಕುರಿತ ವಿಚಾರ ಸಂಕಿರಣದಲ್ಲಿ ಬಾಲಕೃಷ್ಣನ್ ಅವರು ಮಾತನಾಡುತ್ತಿದ್ದರು. ನ್ಯಾಯಾಂಗ ಪ್ರಕ್ರಿಯೆಗಳಿಗೆ ಸಂಬಂಧಿಸಿದಂತೆ ಆರೋಗ್ಯಪೂರ್ಣ ಟೀಕೆ ನಡೆಸ ಬಹುದು ಆದರೆ ಅದು ನ್ಯಾಯಾಂಗದ ಅಧಿಕಾರ ಮತ್ತು ಗೌರವಕ್ಕೆ ಚ್ಯುತಿ ತರಬಾರದು ಎಂದು ತಿಳಿ ಹೇಳಿದ್ದಾರೆ.