ದಲಿತ ಹುಡುಗನಿಗೆ ನಾಸಾ ಕರೆ; ಅಡ್ಡಿಯಾದ ಹಣದ ಹೊರೆ   ಮುಂಬೈ, ಶನಿವಾರ, 17 ಮೇ 2008( 12:47 IST )

ದಲಿತ ಹುಡುಗನೊಬ್ಬನ ಚುರುಕು ಬುದ್ಧಿಯಿಂದ ಪ್ರಭಾವಿತಗೊಂಡಿರುವ ನಾಸಾ, ಆತನನ್ನು ತನ್ನ ಸಂಶೋಧನಾ ತಂಡದಲ್ಲಿ ಸೇರಿಕೊಳ್ಳುವಂತೆ ಆಹ್ವಾನ ನೀಡಿದೆ. ಆದರೆ ಕೊಲೆರೊಡೊ ವಿಶ್ವವಿದ್ಯಾನಿಲಯದಲ್ಲಿ ಸಂಶೋಧನೆಗೆ ತೆರಳಲು ಈತನಿಗೀಗ ಹಣಕಾಸು ಸಮಸ್ಯೆ ಅಡ್ಡಿಯಾಗಿದೆ. ಶ್ರೀಧರ್ ಕಾಂಬ್ಲೆ ಎಂಬ 17ರ ಹರೆಯದ ತರುಣ ತನ್ನ ನಕ್ಷತ್ರಗುಚ್ಛಗಳ ವಿಕಸನ(ಗೆಲಾಕ್ಸಿ ಎವಲ್ಯೂಶನ್) ಕುರಿತು ಮಂಡಿಸಿದ ಸಿದ್ಧಾಂತ ಪ್ರಬಂಧವು ನಾಸಾ ವಿಜ್ಞಾನಿಗಳ ಮೇಲೆ ಪ್ರಭಾವ ಬೀರಿದೆ. ಪರಿಣಾಮ ಗೆಲಾಕ್ಸಿ ಎವಲ್ಯೂಶನ್ ಎಕ್ಸ್‌ಪ್ಲೋರರ್ ಪ್ರಾಜೆಕ್ಟ್‌ನಲ್ಲಿ ಕಿರಿಯ ಸಂಶೋಧನಾ ವಿಜ್ಞಾನಿಯಾಗಿ ಕಾರ್ಯವೆಸಗಲು ಆತನಿಗೆ ಆಹ್ವಾನ ನೀಡಿದ್ದಾರೆ. ನಾಸಾ ವಿಜ್ಞಾನಿಗಳು ಕೊಲೊರಡೊ ವಿಶ್ವವಿದ್ಯಾನಿಲಯದಲ್ಲಿ ಖಗೋಳಶಾಸ್ತ್ರ ಅಧ್ಯಯನ ನಡೆಸಲು 10 ಸಾವಿರ ಡಾಲರ್ ವಿದ್ಯಾರ್ಥಿ ವೇತನವನ್ನೂ ನೀಡುವುದಾಗಿ ಹೇಳಿದ್ದಾರೆ. ಆದರೆ ಒಟ್ಟು ವೆಚ್ಚವು ಸುಮಾರು 50 ಸಾವಿರ ಡಾಲರ್ ಆಗುವ ಕಾರಣ ಈ ಆಹ್ವಾನವನ್ನು ಸ್ವೀಕರಿಸುವುದು ಶ್ರೀಧರ್‌ಗೆ ಸಂಕಷ್ಟಕ್ಕೀಡು ಮಾಡಿದೆ. ಬಡತನದ ತನ್ನ ಕುಟುಂಬವು ಇಷ್ಟುದೊಡ್ಡ ಮೊತ್ತವನ್ನು ಭರಿಸಲಾರದು ಎಂದು ಹೇಳುವ ಶ್ರೀಧರ್, ಪ್ರಾಯೋಜಕರಿಗಾಗಿ ಎದುರು ನೋಡುತ್ತಿದ್ದಾನೆ.