ಐಸಿಎಸ್ಇ ಪರೀಕ್ಷಾ ಫಲಿತಾಂಶ ಪ್ರಕಟ   ನವದೆಹಲಿ, ಮಂಗಳವಾರ, 20 ಮೇ 2008( 19:55 IST )

ಪ್ರೌಢಶಿಕ್ಷಣಕ್ಕಾಗಿ ಭಾರತೀಯ ಮಂಡಳಿ (ಐಸಿಎಸ್ಇ)ಯು ಹತ್ತು ಮತ್ತು ಹನ್ನೆರಡನೆ ತರಗತಿಗಾಗಿ ನಡೆಸಿರುವ ಪರೀಕ್ಷೆಯ ಫಲಿತಾಂಶವು ಮಂಗಳವಾರ ಪ್ರಕಟಗೊಂಡಿದೆ. ಹತ್ತನೆ ತರಗತಿಯಲ್ಲಿ ಶೇ.98.04 ಹಾಗೂ ಹನ್ನೆರಡನೆ ತರಗತಿಯಲ್ಲಿ ಶೇ.97.04ರಷ್ಟು ಫಲಿತಾಂಶ ದಾಖಲಾಗಿದೆ. ಈ ಪರೀಕ್ಷೆಯಲ್ಲೂ ಬಾಲಕಿಯರು ಬಾಲಕರನ್ನು ಹಿಂದಿಕ್ಕಿದ್ದಾರೆ. ಉಭಯ ತರಗತಿಗಳ ಈ ಬಾರಿಯ ಫಲಿತಾಂಶಗಳ ಶೇಕಡಾವಾರಿನಲ್ಲಿ 0.08ರಷ್ಚು ಹೆಚ್ಚಳವಾಗಿದೆ. ಹತ್ತನೆ ತರಗತಿಯಲ್ಲಿ ಶೇ.98.63 ಹಾಗೂ ಹನ್ನೆರಡನೆ ತರಗತಿಯಲ್ಲಿ ಶೇ.98.23 ಬಾಲಕಿಯರು ತೇರ್ಗಡೆ ಹೊಂದಿದ್ದಾರೆ. ಬಾಲಕರು ಅನುಕ್ರಮವಾಗಿ ಶೇ97.57 ಮತ್ತು 96.10 ಫಲಿತಾಂಶ ದಾಖಲಿಸಿದ್ದಾರೆ. ಥಾಣೆಯ ಶ್ರೀಮತಿ ಸುಲೋಚನಾ ದೇವಿ ಸಿಂಗಾನಿಯಾ ಶಾಲೆಯ ಜಾನಕಿ ಕಿರಿಟ್ ಸೇತ್ ಮತ್ತು ವಾರಣಾಸಿಯ ಸೈಂಟ್ ಜೋಸೆಫ್ ಕಾನ್ವೆಂಟಿನ ಶೃತಿ ಸಿಂಗ್ ಅವರುಗಳು ಶೇ.98.6 ಅಂಕ ಗಳಿಸಿದ್ದು ಹತ್ತನೆ ತರಗತಿಯಲ್ಲಿ ಪ್ರಥಮ ಸ್ಥಾನವನ್ನು ಹಂಚಿಕೊಂಡಿದ್ದಾರೆ. ಹನ್ನೆರಡನೆ ತರಗತಿಯಲ್ಲಿ ಡೆಹ್ರಾಡೂನ್‌ನ ಡೂನ್ ಶಾಲೆಯ ಗೌರವ್ ಸೂದ್ ಶೇ.99 ಅಂಕಗಳಿಸಿ ಪ್ರಥಮ ಸ್ಥಾನಗಳಿಸಿದ್ದಾನೆ.