ಅಣು ಒಪ್ಪಂದ ಪರಿಹಾರಕ್ಕೆ ಕರಣಾಗೆ ವಾಮರ ಮನವಿ   ನವದೆಹಲಿ, ಸೋಮವಾರ, 23 ಜೂನ್ 2008( 12:51 IST )

PTI ಭಾರತ-ಅಮೆರಿಕ ಅಣುಒಪ್ಪಂದವು ಭಾರತದಲ್ಲಿ ಕಾವೇರಿಸುತ್ತಿದ್ದು, ಸಂಯುಕ್ತ ಪ್ರಗತಿಪರ ಮೈತ್ರಿಕೂಟ(ಯುಪಿಎ) ಮತ್ತು ಎಡಪಕ್ಷಗಳ ನಡುವಿನ ಭಿನ್ನಾಭಿಪ್ರಾಯಗಳನ್ನು ಪರಿಹರಿಸಲು ಪ್ರಯತ್ನಗಳು ಮುಂದುವರಿದಿವೆ. ಏತನ್ಮಧ್ಯೆ, ಎಡಪಕ್ಷಗಳು ಮತ್ತು ಯುಪಿಎ ನಡುವೆ ಸಂಧಾನಕಾರರಾಗಿ ಮೂಡಿ ಬಂದಿರುವ ತಮಿಳ್ನಾಡು ಮುಖ್ಯಮಂತ್ರಿ, ಡಿಎಂಕೆ ನಾಯಕ ಎಂ.ಕರುಣಾನಿಧಿ ಅವರನ್ನು ಎಡಪಕ್ಷಗಳು ರಾಜೀಸೂತ್ರ ಒಂದಕ್ಕೆ ಬರುವಂತೆ ಸಹಾಯ ಮಾಡಲು ಕೋರಿವೆ. ಸಿಪಿಐ-ಎಂ ಪ್ರಧಾನ ಕಾರ್ಯದರ್ಶಿ ಪ್ರಕಾಶ್ ಕಾರಟ್ ಮತ್ತು ಸಿಪಿಐ ನಾಯಕ ಡಿ ರಾಜಾ ಅವರುಗಳು ಭಾನುವಾರ ಕರುಣಾನಿಧಿಯವರನ್ನು ಚೆನ್ನೈನಲ್ಲಿ ಭೇಟಿ ಮಾಡಿದ್ದು, ಅಣು ಒಪ್ಪಂದದ ತೊಡಕುಗಳ ಕುರಿತು ಚರ್ಚಿಸಿದರು. ಅಣು ಒಪ್ಪಂದವೂ ಬೇಕು ಮತ್ತು ಎಡಪಕ್ಷಗಳ ಬೆಂಬಲವೂ ಬೇಕು ಎಂಬ ನಿಲುವು ಹೊಂದಿರುವ ಡಿಎಂಕೆಯು ತಾಳ್ಮೆಯಿಂದಿರುವಂತೆ ಎಡಪಕ್ಷಗಳನ್ನು ಕೋರಿದೆ. ಅಂತೆಯೆ, ಈ ವಿವಾದದ ಕುರಿತು ಸೂಕ್ತ ನಿರ್ಧಾರವನ್ನು ಕೈಗೊಂಡು ಸಹಾಯ ಮಾಡುವಂತೆ ಎಡಪಕ್ಷಗಳು ಕರುಣಾನಿಧಿಯವರನ್ನು ವಿನಂತಿಸಿರುವುದಾಗಿ ಕಾರಟ್ ಹೇಳಿದ್ದಾರೆ. ಐಎಇಎಯೊಂದಿಗೆ ಸುರಕ್ಷತಾ ಒಪ್ಪಂದದಲ್ಲಿ ಯುಪಿಎ ಮುಂದುವರಿಯುವ ಕುರಿತು ಎಡಪಕ್ಷಗಳ ಅಭಿಪ್ರಾಯವನ್ನೂ ಮಾತುಕತೆಯ ವೇಳೆಗೆ ಪ್ರಸ್ತಾಪಿಸಿರುವುದಾಗಿ ಕಾರಟ್ ತಿಳಿಸಿದ್ದಾರೆ.