ತಡೆಹಿಡಿಲ್ಪಟ್ಟಿದ್ದ ಅಮರನಾಥ ಯಾತ್ರೆ ಪುನಾರಂಭ   ಜಮ್ಮು, ಸೋಮವಾರ, 30 ಜೂನ್ 2008( 15:10 IST )

ಪ್ರತಿಕೂಲ ಹವಾಮಾನದಿಂದ ಒಂದು ದಿನದವರೆಗೆ ತಡೆಹಿಡಿಯಲ್ಪಟ್ಟಿದ್ದ ಅಮರನಾಥ ಯಾತ್ರೆ ಪುನಾರಂಭಗೊಂಡಿದೆ. ಬಿಗಿ ಭದ್ರತೆಯ ನಡುವೆ 3531 ಯಾತ್ರಾರ್ಥಿಗಳ ಹೊಸ ತಂಡ ಶಿಬಿರದಿಂದ ಪವಿತ್ರ ಗುಹಾ ದೇವಾಲಯಕ್ಕೆ ಹೊರಟಿದೆ. 70 ಮಕ್ಕಳು, 619 ಮಹಿಳೆಯರನ್ನೊಳಗೊಂಡಿದ್ದ ಭಕ್ತಾದಿಗಳ ತಂಡ ಭಗವತಿ ನಗರದ ಶಿಬಿರದಿಂದ ದಕ್ಷಿಣ ಕಾಶ್ಮೀರದಲ್ಲಿರುವ ಅಮರನಾಥ ದೇವಾಲಯಕ್ಕೆ ಮುಂಜಾನೆ 5.30ರ ವೇಳೆಗೆ ಹೊರಟಿದೆ ಎಂದು ಪೋಲಿಸರು ತಿಳಿಸಿದರು. ಯಾತ್ರಾರ್ಥಿಗಳನ್ನು ಹೊತ್ತಿದ್ದ ವಾಹನಗಳು ಸಿಎರ್‌ಪಿಎಫ್ ಸಿಬ್ಬಂದಿಗಳ ಬೆಂಗಾವಲಿನೊಂದಿಗೆ ಮುಂದೆ ಸಾಗಿದವು, ಎಂದು ಅವರು ಹೇಳಿದರು. ದೇವಾಲಯದತ್ತ ಸಾಗುವ ದಾರಿಗಳಲ್ಲಿ ಪ್ರತಿಕೂಲ ಹವಾಮಾನ ಹಾಗು ಭಾರಿ ಮಳೆಯಿಂದಾಗಿ ನಿನ್ನೆ ಯಾತ್ರೆಯನ್ನು ಕೈ ಬಿಡಲಾಗಿತ್ತು. ಜೂನ್ 17ರಿಂದ ಮೊದಲ್ಗೊಂಡ ಯಾತ್ರೆಗೆ ಇದುವರೆಗೆ ದೇಶದ ವಿವಿಧ ಭಾಗಗಳಿಂದ ಆಗಮಿಸಿದ 30,593 ಯಾತ್ರಾರ್ಥಿಗಳು ಅಮರನಾಥ ದೇವಾಲಯಕ್ಕೆ ಜಮ್ಮುವಿನ ಶಿಬಿರದಿಂದ ತೆರಳಿದ್ದಾರೆ. ಸುಮಾರು 3,78,987 ಯಾತ್ರಾರ್ಥಿಗಳು ಲಿಡ್ಡರ್ ಕಣಿವೆಯ ಗುಹಾದೇವಾಲಯದಲ್ಲಿರುವ 'ಹಿಮ ಲಿಂಗ'ಕ್ಕೆ ಪ್ರಾರ್ಥನೆ ಅರ್ಪಿಸಿದ್ದಾರೆ.