ವಿಶ್ವಾಸ ಮತಯಾಚನೆ ನಂತರ ಐಎಇಎ ಬಳಿಗೆ   ನವದೆಹಲಿ, ಶುಕ್ರವಾರ, 11 ಜುಲೈ 2008( 18:48 IST )

PTI ಅಮೆರಿಕ-ಭಾರತ ಅಣು ಒಪ್ಪಂದಕ್ಕೆ ಸಂಬಂಧಿಸಿದಂತೆ, ಭಾರತಕ್ಕೆ ನಿರ್ದಿಷ್ಟವಾಗಿರುವ ಸುರಕ್ಷತಾ ಒಪ್ಪಂದದ ಅಂಗೀಕಾರಕ್ಕಾಗಿ, ಲೋಕಸಭೆಯಲ್ಲಿ ವಿಶ್ವಾಸ ಮತ ಗೆದ್ದ ಬಳಿಕವೇ, ಯುಪಿಎ ಸರಕಾರ ಐಎಇಎ ಬಳಿ ತೆರಳಲಿದೆ ಉನ್ನತ ಮೂಲಗಳು ಹೇಳಿವೆ. ಐಎಇಎ ಮಂಡಳಿಯ ಗವರ್ನರ್‌ಗಳಿಗೆ ಸುರಕ್ಷತಾ ಒಪ್ಪಂದದ ಕರಡನ್ನು ಹಂಚುವುದರಿಂದ ಅಂಗೀಕಾರ ಪಡೆದಂತಾಗುವುದಿಲ್ಲ, ಇದೊಂದು ಪ್ರಕ್ರಿಯೆಯಾಗಿದ್ದು ದಾಖಲೆಯನ್ನು ಓದಲು ಐಎಇಎ ಸದಸ್ಯರಿಗೆ ಸಾಕಷ್ಟು ಸಮಯಾವಕಾಶ ನೀಡಿದಂತಾಗುತ್ತದೆ ಅಷ್ಟೆ ಎಂಬುದಾಗಿ ಸರಕಾರ ತನ್ನ ಕ್ರಮವನ್ನು ಸಮರ್ಥಿಸಿಕೊಂಡಿದೆ. ರಾಜಕೀಯ ಪ್ರಾಧಿಕಾರ ಮತ್ತು ಕರಡು ದಾಖಲೆಯ ವಿತರಣೆಗಾಗಿ ಬುಧವಾರ ಐಎಇಎಯನ್ನು ಸಂಪರ್ಕಿಸಿರುವ ಕಾರ್ಯಕಾರಿ ನಡುವೆ ಯಾವುದೇ ವಿರೋಧಾಭಾಸಗಳಿಲ್ಲ ಎಂದು ಮೂಲಗಳು ಸ್ಪಷ್ಟಪಡಿಸಿವೆ. ವಿಶ್ವಾಸಮತ ಯಾಚನೆಯ ಬಳಿಕವೇ ಐಎಇಎ ಬಳಿ ತೆರಳುವುದಾಗಿ ವಿದೇಶಾಂಗ ವ್ಯವಹಾರಗಳ ಸಚಿವ ಪ್ರಣಬ್ ಮುಖರ್ಜಿ ಅವರು ನೀಡಿರುವ ಹೇಳಿಕೆಗೂ ಸರಕಾರದ ನಡೆಯಲ್ಲೂ ವೈರುಧ್ಯಗಳಿವೆ ಎಂಬ ಟೀಕೆಗಳಿಗೆ ಅವರು ಪ್ರತಿಕ್ರಿಯಿಸುತ್ತಿದ್ದರು. ಒಮ್ಮೆ ಸರಕಾರದಿಂದ ಹೊರ ನಡೆದ ಮೇಲೆ ಎಡಪಕ್ಷಗಳಿಗೆ ಇದರ ಕುರಿತು ಟೀಕಿಸಲು ಅಧಿಕಾರವಿಲ್ಲ. ಎರಡು ಪಕ್ಷಗಳ ನಡುವೆ ಸಂಬಂಧ ಕಡಿದು ಹೋಗಿದ್ದು, ಈ ಕುರಿತ ರಾಜಕೀಯ ಯಂತ್ರ ಸ್ಥಗಿತಗೊಂಡ ಬಳಿಕ ಅವರಿಗೆ ಸರಕಾರವನ್ನು ಪ್ರಶ್ನಿಸುವ ಹಕ್ಕಿಲ್ಲ ಎಂದು ಮೂಲಗಳು ಎಡಪಕ್ಷಗಳ ಪ್ರತಿಕ್ರಿಯೆಗಳನ್ನು ತಳ್ಳಿ ಹಾಕಿವೆ.