ಅಭಿನಂದನೆಗಳು, ಸಿಂಗ್ ಈಸ್ ಕಿಂಗ್!   ಚಂಡೀಗಢ, ಬುಧವಾರ, 23 ಜುಲೈ 2008( 10:33 IST )

PTI ಭಾರತಕ್ಕೆ ಅಭಿನಂದನೆಗಳು.... ಸಿಂಗ್ ಈಸ್ ಕಿಂಗ್.... ಇತ್ಯಾದಿ ಶುಭಾಶಯ ಕೋರುವ ಎಸ್ಎಂಎಸ್‌‌ಗಳು ವಿಶ್ವಾಸಮತದಲ್ಲಿ ಯುಪಿಎ ಸರಕಾರ ಗೆಲುವು ಸಾಧಿಸಿದ ಕೆಲವೇ ಕ್ಷಣಗಳಲ್ಲಿ ಪಂಜಾಬ್ ಮತ್ತು ಇತರೆಲ್ಲೆಡೆ ಒಬ್ಬರಿಂದೊಬ್ಬರಿಗೆ ರವಾನೆಯಾಗುತ್ತಿದ್ದು, ಈ ಎಸ್ಎಂಎಸ್‌ಗಳು ಯುಪಿಎ ಬೆಂಬಲಿಗರ ಹರ್ಷೋತ್ಕರ್ಷದ ಭಾವನೆಗಳನ್ನು ವ್ಯಕ್ತಪಡಿಸುತ್ತಿದ್ದವು. ಸರಕಾರವು 275-256ರ ಅಂತರದಲ್ಲಿ ಸಂಸದರ ಬೆಂಬಲವನ್ನು ಪಡೆದು ವಿಶ್ವಾಸಮತದಲ್ಲಿ ಗೆಲುವು ಸಾಧಿಸಿದೆ ಎಂದು ಸ್ಪೀಕರ್ ಸೋಮನಾಥ್ ಚಟರ್ಜಿ ಅವರು ಘೋಷಿಸಿದ ಕ್ಷಣದಲ್ಲೇ, ಅಮೃತಸರ, ಪಂಜಾಬ್ ಮತ್ತು ಇತರ ಪ್ರದೇಶಗಳಲ್ಲಿ ಸಂಭ್ರಮಾಚರಣೆಯು ಮುಗಿಲು ಮುಟ್ಟಿತ್ತು. ಪಂಜಾಬ್‌ನ ವಿವಿಧ ಪ್ರದೇಶಗಳಲ್ಲಿ ಕಾಂಗ್ರೆಸ್ ಕಾರ್ಯಕರ್ತರು ಪಟಾಕಿಗಳನ್ನು ಸಿಡಿಸಿ ಸಿಹಿ ತಿಂಡಿಗಳನ್ನು ಹಂಚಿದರು. ಅಮೃತಸರ ಮತ್ತು ಲುಧಿಯಾನಾದಲ್ಲಿ ನೆಲೆಸಿರುವ ಸಿಂಗ್ ಅವರ ಸಂಬಂಧಿಕರು ವಿಶ್ವಾಸಮತ ಗೆಲುವಿನ ಸಂಬಂಧ ಈ ವಾರ ಪೂಜೆಯನ್ನು ನಡೆಸಲಿದ್ದಾರೆ. ಏನೇ ಆದರೂ, ಪಂಜಾಬ್‌ನ ಆಡಳಿತಾರೂಢ ಅಕಾಲಿ ದಳವು ಪ್ರಧಾನಮಂತ್ರಿ ಅವರನ್ನು ಬೆಂಬಲಿಸಲು ಖಡಾಖಂಡಿತವಾಗಿ ನಿರಾಕರಿಸಿದ್ದು, ಮನಮೋಹನ್ ಸಿಂಗ್ ಅವರು ಸಿಖ್ ಸಮುದಾಯಕ್ಕೆ ಸೇರಿದವರಾಗಿದ್ದು, ಪಂಜಾಬ್ ರಾಜ್ಯದವರಾಗಿದ್ದರೂ, ಪಂಜಾಬ್ ರಾಜ್ಯ ಹಾಗೂ ಸಿಖ್ ಸಮುದಾಯಕ್ಕೆ ಏನೂ ಸಹಾಯ ಮಾಡಿಲ್ಲ ಎಂಬುದಾಗಿ ಆರೋಪಿಸಿದರು. ಮನಮೋಹನ್ ಸಿಂಗ್ ಅವರು ದೇಶದ ಮೊದಲ ಸಿಖ್ ಪ್ರಧಾನಿ ಆಗಿದ್ದಾರೆ.