ಗಡಿ ನಿಯಂತ್ರಣ ರೇಖೆಯಲ್ಲಿ ಪಾಕಿಸ್ತಾನೀ ಸೈನಿಕರು ಮತ್ತೊಂದು ಬಾರಿ ಕದನ ವಿರಾಮ ಉಲ್ಲಂಘಿಸಿದ್ದು, ಜಮ್ಮು ಕಾಶ್ಮೀರ ಗಡಿರೇಖೆ ಸೇರಿದಂತೆ ಕುಪ್ವಾರ ಕ್ಷೇತ್ರದ ನಹಾರಿಯ ನೆಲೆಯಲ್ಲಿ ಪಾಕಿಸ್ತಾನ ಪಡೆಗಳು ಬುಧವಾರ ಭಾರತೀಯ ಪಡೆಗಳ ಮೇಲೆ ಗುಂಡಿನ ದಾಳಿ ನಡೆಸಿದ್ದಾರೆ.
ಎರಡು ದಿನಗಳ ಹಿಂದೆ ಗುಂಡಿನ ದಾಳಿ ನಡೆದ ನೌಗಾಂವ್ ಪ್ರದೇಶದ ಸಮೀಪದಲ್ಲೇ ಈ ನಹಾರಿಯಾ ಕೂಡ ಇದೆ. ಸೋಮವಾರದ ಘಟನೆಯಲ್ಲಿ ಒಬ್ಬ ಭಾರತೀಯ ಸೈನಿಕ ಬಲಿಯಾಗಿದ್ದರೆ, ದುಸ್ಸಾಹಸಕ್ಕಿಳಿದ ನಾಲ್ವರು ಪಾಕ್ ಸೈನಿಕರನ್ನು ಗುಂಡಿಟ್ಟು ಕೊಲ್ಲಲಾಗಿತ್ತು.
ಈ ತಿಂಗಳಲ್ಲಿ ಕನಿಷ್ಠ ಏಳು ಬಾರಿ ಕದನವಿರಾಮ ಉಲ್ಲಂಘನೆಯ ವರದಿಯಾಗಿದ್ದು, ಕಳೆದ ವಾರ ಪೂಂಚ್ ಜಿಲ್ಲೆಯ ಮೆಂದಾರ್‌ನಲ್ಲಿ ಭಾರತ ಮತ್ತು ಪಾಕಿಸ್ತಾನಿ ಪಡೆಗಳ ನಡುವೆ ಗುಂಡಿನ ಚಕಮಕಿ ನಡೆದಿತ್ತು.
ಜುಲೈ 17ರಂದು ಒಂದೇ ದಿನ ಮೂರು ಹಿಂಸಾಚಾರ ನಡೆದಿತ್ತು. ಮೊದಲನೆಯದು ಚೌಕಾಲಿಯಲ್ಲಿ ಪಾಕಿಸ್ತಾನಿ ಪಡೆಗಳು ಎರಡು ಸುತ್ತು ಗುಂಡು ಹಾರಿಸಿದ್ದರು. ಅದೇ ದಿನ ಮೆಂದಾರ್‌ ಪೋನಾ ನೆಲೆಯಲ್ಲಿ ಅನಿರೀಕ್ಷಿತ ಗುಂಡಿನ ದಾಳಿಗೆ ಸೈನಿಕನೊಬ್ಬ ಗಾಯಗೊಂಡಿದ್ದರು. ಮೂರನೆಯದಾಗಿ, ರಾಜೌರಿ ಪೀರ್ ನೆಲೆಯಲ್ಲಿ ಪಾಕಿಸ್ತಾನಿ ಪಡೆಗಳು 40 ಸುತ್ತು ಗುಂಡು ಹಾರಿಸಿದ್ದರು.
|
ಸಲಹೆ/ಪ್ರತಿಕ್ರಿಯೆ
ಮಿತ್ರನಿಗೆ ಕಳುಹಿಸಿ
ಈ ಪುಟ ಮುದ್ರಿಸಿ
