ಉತ್ತಮ ಬೆಳವಣಿಗೆಯೆಂಬಂತೆ, ಭಾರತೀಯ ಬಾಡಿಗೆ ತಾಯಿಗೆ ಜನಿಸಿದ 14 ದಿನಗಳ ಜಪಾನೀಸ್ ಮಗು ಮಂಜಿಗೆ ಜೈಪುರ ಮಹಾನಗರ ಪಾಲಿಕೆಯು ಜನನ ಪ್ರಮಾಣಪತ್ರವನ್ನು ನೀಡಿದೆ. ಜನನ ಪ್ರಮಾಣ ಪತ್ರದಲ್ಲಿ ಜಪಾನೀ ಮೂಲದ ಮಗುವಿನ ತಂದೆಯ ಹೆಸರನ್ನು ನಮೂದಿಸಿದ್ದು, ಆದರೆ, ತಾಯಿಯ ಹೆಸರಿನ ಜಾಗವನ್ನು ಖಾಲಿ ಬಿಡಲಾಗಿದೆ.
ಈ ಬೆಳವಣಿಗೆಯು ಮಂಜಿಗೆ ಜಪಾನ್‌ಗೆ ತೆರಳಲು ಅನುಕೂಲ ಮಾಡಿಕೊಡಲಿದೆ. ಈವರೆಗೆ, ಹಸುಳೆ ಮಂಜಿಗೆ ಪಾಸ್‌ಪೋರ್ಟ್ ಇಲ್ಲದ ಕಾರಣ ಆಕೆಯನ್ನು ಜಪಾನ್‌ಗೆ ಕರೆದೊಯ್ಯಲು ಆಕೆಯ ವೈದ್ಯ ತಂದೆಗೆ ತೊಡಕುಂಟಾಗಿತ್ತು.
ಮಂಜಿಯ ಪೋಷಕರು ವರ್ಷದ ಹಿಂದೆ ಭಾರತಕ್ಕೆ ಬಂದಿದ್ದರು. ಮಗು ಬೇಕೆಂದು ಅಹಮದಾಬಾದಿನ ಬಾಡಿಗೆ ತಾಯನ್ನು ಸಂಪರ್ಕಿಸಿದರು. ಆದರೆ, ಬಾಡಿಗೆ ತಾಯಿಗೆ ಮಗು ಜನಿಸುವ ಒಂದು ತಿಂಗಳ ಹಿಂದೆ ಪರಸ್ಪರ ವಿಚ್ಚೇದನ ನೀಡಿದ್ದರು.
ಮಗು ಜನಿಸಿದ ಬೆನ್ನಲ್ಲೇ, ಅಹಮದಾಬಾದಿನಲ್ಲಿ ಸರಣಿ ಸ್ಫೋಟ ಸಂಭವಿಸಿದ ಹಿನ್ನೆಲೆಯಲ್ಲಿ, ಮಗುವನ್ನು ಆರೈಕೆಗಾಗಿ ಜೈಪುರಕ್ಕೆ ಕಳುಹಿಸಲಾಗಿತ್ತು.
ಮಗುವನ್ನು ಜಪಾನಿಗೆ ಕರೆದುಕೊಂಡು ಹೋಗಲು ಮಗುವಿನ ತಂದೆಯು ಬಯಸಿದ್ದು ಕಾನೂನು ತೊಡಕು ಎದುರಾಗಿತ್ತು. ಆದರೆ ಇದೀಗ ಜನನ ಪತ್ರ ದೊರೆಯುತ್ತಲೇ ಅವರ ವೀಸಾ ಅವಧಿ ಮುಗಿದಿದೆ. ಹಾಗಾಗಿ ಅವರು ಜಪಾನ್‌ಗೆ ತುರ್ತಾಗಿ ತೆರಳಲೇಬೇಕಾಗಿದೆ.
ಮಗುವಿನ ಆರೈಕೆಯನ್ನು ಉತ್ತಮವಾಗಿ ಮಾಡಲಾಗುತ್ತಿದೆ ಎಂದು ಮಗುವನ್ನು ನೋಡಿಕೊಳ್ಳುತ್ತಿರುವ ಆರ್ಯ ಆಸ್ಪತ್ರೆಯ ವೈದ್ಯರು ತಿಳಿಸಿದ್ದಾರೆ.
|
ಸಲಹೆ/ಪ್ರತಿಕ್ರಿಯೆ
ಮಿತ್ರನಿಗೆ ಕಳುಹಿಸಿ
ಈ ಪುಟ ಮುದ್ರಿಸಿ