ಸೌದಿಯಲ್ಲಿ ಅನೀಸ್ ಇಬ್ರಾಹಿಂ ಬಂಧನ ? ನವದೆಹಲಿ, ಮಂಗಳವಾರ, 12 ಆಗಸ್ಟ್ 2008( 15:15 IST )

ಭೂಗತ ಜಗತ್ತಿನ ದೊರೆ ದಾವೂದ್ ಇಬ್ರಾಹಿಂ ಸಹೋದರ ಅನೀಸ್ ಇಬ್ರಾಹಿಂನನ್ನು ಮಂಗಳವಾರ ಸೌದಿ ಅರೇಬಿಯಾದ ಜೆಡ್ಡಾ ವಿಮಾನ ನಿಲ್ದಾಣದಲ್ಲಿ ಬಂಧಿಸಲಾಗಿದೆ ಎಂದು ಮಾಧ್ಯಮ ವರದಿ ತಿಳಿಸಿದೆ. ನಕಲಿ ಪಾಸ್‌ಫೋರ್ಟ್ ಹೊಂದಿರುವ ಆರೋಪದ ಮೇಲೆ ಅನೀಸ್ ಇಬ್ರಾಹಿಂನನ್ನು ವಿಮಾನ ನಿಲ್ದಾಣದಲ್ಲಿ ಸೆರೆ ಹಿಡಿಯಲಾಗಿದೆ ಎಂದು ಹೇಳಲಾಗುತ್ತಿದೆಯಾದರು ಸೌದಿ ಅರೇಬಿಯಾ ಮಾತ್ರ ಬಂಧನವನ್ನು ಅಧಿಕೃತವಾಗಿ ಇನ್ನೂ ಖಚಿತಪಡಿಸಿಲ್ಲ. ಈ ನಿಟ್ಟಿನಲ್ಲಿ ಜೆಡ್ಡಾದಲ್ಲಿರುವ ಭಾರತೀಯ ರಾಯಭಾರ ಕಚೇರಿ ಮತ್ತು ನಗರ ಇಂಟರ್‌ಪೋಲ್, ಆನೀಸ್ ಬಂಧನವನ್ನು ಖಚಿತಪಡಿಸಿ ಕೊಂಡು ಮುಂದಿನ ಕ್ರಮದ ಕುರಿತು ಕಾರ್ಯಪ್ರವೃತ್ತವಾಗುವುದಾಗಿ ಅಧಿಕಾರಿಗಳು ತಿಳಿಸಿರುವುದಾಗಿ ಟೈಮ್ಸ್ ನೌ ಮಾಧ್ಯಮದ ವರದಿ ತಿಳಿಸಿದೆ. ಅನೀಸ್ ಇಬ್ರಾಹಿಂ 1993ರಲ್ಲಿ ವಾಣಿಜ್ಯನಗರಿ ಮುಂಬೈಯನ್ನು ತಲ್ಲಣಗೊಳಿಸಿದ ಸರಣಿ ಬಾಂಬ್ ಸ್ಫೋಟದ ಪ್ರಮುಖ ರೂವಾರಿಗಳಲ್ಲೊಬ್ಬನಾಗಿದ್ದಾನೆ. ಸರಣಿ ಬಾಂಬ್ ಸ್ಫೋಟದ ಸಂಚಿನ ರೂವಾರಿಯಾಗಿದ್ದ ಅನೀಸ್, ಸ್ಫೋಟ ಕೃತ್ಯಕ್ಕಾಗಿ ಆತ ಎಕೆ56 ಹಾಗೂ ಸ್ಫೋಟಕ ವಸ್ತುಗಳನ್ನು ಮುಂಬೈಗೆ ರವಾನಿಸಿದ್ದ.