93 ಬ್ಲಾಸ್ಟ್: ರುಬೀನಾ ಜಾಮೀನು ತಿರಸ್ಕೃತ ನವದೆಹಲಿ, ಶುಕ್ರವಾರ, 19 ಸೆಪ್ಟೆಂಬರ್ 2008( 20:41 IST )

ವಾಣಿಜ್ಯ ಮಹಾನಗರಿ ಮುಂಬೈಯನ್ನು 1999ರಲ್ಲಿ ತಲ್ಲಣಗೊಳಿಸಿದ್ದ ಸರಣಿ ಬಾಂಬ್ ಸ್ಫೋಟ ಪ್ರಕರಣದ ಸಹ ಆರೋಪಿಯಾಗಿರುವ ರುಬೀನಾ ಮೆಮೊನ್‌ ಜಾಮೀನು ಅರ್ಜಿಯನ್ನು ಸುಪ್ರೀಂಕೋರ್ಟ್ ಶುಕ್ರವಾರ ತಿರಸ್ಕರಿಸಿದೆ. ರುಬೀನಾ ಜಾಮೀನು ಅರ್ಜಿಯನ್ನು ತಿರಸ್ಕರಿಸುವುದರ ಜೊತೆಗೆ ಮುಂಬೈ ಸರಣಿ ಬಾಂಬ್ ಸ್ಫೋಟಕ್ಕೆ ಸಂಬಂಧಿಸಿದಂತೆ ಬಾಕಿ ಉಳಿದಿರುವ ಎಲ್ಲಾ ಪ್ರಕರಣಗಳ ವಿಚಾರಣೆಯನ್ನು ನಡೆಸುವಂತೆ ಸುಪ್ರೀಂ ಆದೇಶ ನೀಡಿದೆ. ಪ್ರಕರಣದ ಪ್ರಮುಖ ರೂವಾರಿಗಳಾಗಿರುವ ಇಬ್ರಾಹಿಂ ಮುಷ್ತಾಕ್ ಆಲಿಯಾಸ್ ಟೈಗರ್ ಮೆಮೊನ್ ತಲೆಮರೆಸಿಕೊಂಡಿದ್ದು, ರುಬೀನಾ ಅವರ ಆಪ್ತ ಸಂಬಂಧಿಯಾಗಿದ್ದಾನೆ. ಇತ್ತೀಚೆಗಷ್ಟೇ ಮುಂಬೈಯ ತ್ವರಿತಗತಿ ನ್ಯಾಯಾಲಯ ಟೈಗರ್ ಸಹೋದರರಾದ ಯಾಕೂಬ್,ಇಸ್ಸಾ ಮತ್ತು ಯೂಸೂಫ್ ಸೇರಿದಂತೆ ನಾದಿನಿ ರುಬೀನಾ ಅವರುಗಳನ್ನು ಸ್ಫೋಟದಲ್ಲಿ ಪಿತೂರಿ ನಡೆಸಿರುವುದರ ಬಗ್ಗೆ ಆರೋಪ ಸಾಬೀತುಪಡಿಸಿತ್ತು.