ಗೋಧ್ರಾ ನರಮೇಧ ವ್ಯವಸ್ಥಿತ ಪಿತೂರಿ ಎಂಬುದನ್ನು ನಾನಾವತಿ ಆಯೋಗದ ವರದಿ ಬಹಿರಂಗಗೊಳಿಸಿದೆ.ಆದರೆ ಇಷ್ಟು ದಿನ ಸೆಕ್ಯುಲರ್ ಮುಖವಾಡದೊಂದಿಗೆ ಬೊಬ್ಬಿರಿದು ಕೊಲೆಗಾರರನ್ನು ರಕ್ಷಿಸಲು ಹೆಣಗಾಡುತ್ತಿದ್ದವರು ಈಗಲಾದರು ಕ್ಷಮೆ ಕೋರಬೇಕೆಂದು ಗುಜರಾತ್ ಮುಖ್ಯಮಂತ್ರಿ ನರೇಂದ್ರ ಮೋದಿ ಆಗ್ರಹಿಸಿದ್ದಾರೆ.
ಅವರು ಇಲ್ಲಿ ಶುಕ್ರವಾರ ಸಂಜೆ ನಡೆದ ರಸ್ತೆ ಉದ್ಘಾಟನಾ ಸಮಾರಂಭದ ಕಾರ್ಯಕ್ರಮವೊಂದರಲ್ಲಿ ಭಾಗವಹಿಸಿ ಮಾತನಾಡುತ್ತ,ಇಷ್ಟು ದಿನ ಸುಳ್ಳು ಪ್ರಚಾರ ಮಾಡುತ್ತಿದ್ದವರಿಗೆ ಈಗ ಮುಖ ಎತ್ತಿ ತೋರಿಸಲೂ ಆಗದಂತಾಗಿದೆ. ಸತ್ಯ,ನ್ಯಾಯಕ್ಕೆ ಅವರು ಬೆಲೆ ಕೊಡುವವರೇ ಆದರೆ ಗುಜರಾತ್ ಜನತೆಯ ಕ್ಷಮೆ ಕೋರಬೇಕು ಎಂದು ಆಗ್ರಹಿಸಿದರು.
ನಕಲಿ ಪ್ರಗತಿಪರರು ಇಷ್ಟು ದಿನ ತಮ್ಮ ವಿರುದ್ಧ ಗಂಟಲು ಬಿರಿಯುವಂತೆ ಅಪಪ್ರಚಾರ ಮಾಡುತ್ತಿದ್ದರು, ಒಂದಲ್ಲ ಒಂದು ದಿನ ಸತ್ಯ ಹೊರಕ್ಕೆ ಬಂದೇ ಬರುತ್ತದೆಂದು ನಾವು ಮೌನವಾಗಿದ್ದೆವು.ಈಗ ಹುಸಿ ಮುಖವಾಡ ಕಳಚಿಬಿದ್ದಿದೆ ಎಂದು ಮೋದಿ ಲೇವಡಿ ಮಾಡಿದರು.
ಈ ಹತ್ಯಾಕಾಂಡದ ಬಗ್ಗೆ ವಿಚಾರಣೆ ನಡೆಸಲು ಅಧಿಕೃತ ಆಯೋಗವೇ ಇದ್ದಾಗ ಕಾಂಗ್ರೆಸ್ ಯು.ಸಿ.ಬ್ಯಾನರ್ಜಿ ಆಯೋಗವನ್ನು ರಚಿಸಿದ್ದಾದರೂ ಏಕೆ ಎಂದು ಮೋದಿ ಖಾರವಾಗಿ ಪ್ರಶ್ನಿಸಿದ್ದಾರೆ.
ಇದೀಗ ನಾನಾವತಿ ಆಯೋಗ ಹತ್ಯಾಕಾಂಡದ ಬಗೆಗಿನ ಒಂದನೇ ವರದಿಯನ್ನು ನೀಡಿದ್ದು, ಎರಡನೇ ವರದಿಯನ್ನು ಡಿಸೆಂಬರ್ ವೇಳೆಗೆ ನೀಡಲಿದೆ.
|
ಸಲಹೆ/ಪ್ರತಿಕ್ರಿಯೆ
ಮಿತ್ರನಿಗೆ ಕಳುಹಿಸಿ
ಈ ಪುಟ ಮುದ್ರಿಸಿ