ಫುಟ್ಬಾಲ್ ಮೈದಾನ ಒಂದನ್ನು ಅರ್ಧದಷ್ಟು ತುಂಬುವಂತೆ ತನ್ನ ರೆಕ್ಕೆಗಳನ್ನು ಚಾಚಬಲ್ಲ ಏರ್ಬಸ್ ಇಂಡಸ್ಟ್ರೈಯ ಎ-380 ವಿಮಾನವು ಬುಧವಾರ ಹೈದರಾಬಾದ್ ನಗರದಲ್ಲಿ ಹಾರಾಡಲಿದೆ.
ಈ ಬೃಹತ್ ವಿಮಾನವು, ಭಾರತದಲ್ಲಿ ಬುಧವಾರ ಆರಂಭವಾಗಲಿರುವ ಪ್ರಪ್ರಥಮ ವೈಮಾನಿಕ ಪ್ರದರ್ಶನ 'ಇಂಡಿಯಾ ಏವಿಯೇಶನ್ 2008'ರಲ್ಲಿ ಪಾಲ್ಗೊಳ್ಳಲು ಆಗಮಿಸುತ್ತಿದೆ. ಈ ಕಾರ್ಯಕ್ರಮದಲ್ಲಿ ವಿವಿಧ ವಿನ್ಯಾಸಗಳ ಕನಿಷ್ಠ 37 ವಿಮಾನಗಳು ಮತ್ತು ಹೆಲಿಕಾಫ್ಟರ್‌ಗಳು ಹಾರಾಡಲಿವೆ. 853 ಪ್ರಯಾಣಿಕರನ್ನು ಕರೆದೊಯ್ಯಬಲ್ಲ ನಾಲ್ಕು ಎಂಜಿನ್‌ಗಳ ಡಬ್ಬಲ್ ಡೆಕ್ಕರ್ ವಿಮಾನವೂ ಪಟ್ಟಿಯಲ್ಲಿದೆ.
ಹೈದರಾಬಾದಿನ ಹಳೆ ಬೇಗಂಪೇಟೆ ವಿಮಾನ ನಿಲ್ದಾಣದಲ್ಲಿ ಈ ಪ್ರದರ್ಶನಕ್ಕೆ ಚಾಲನೆ ಲಭಿಸಲಿದೆ. ಬೋಯಿಂಗ್ 777, ಎ-340-400, ಕೆನಡಾದ ಪ್ರಾದೇಶಿಕ ಜೆಟ್ ಬೊಂಬಾರ್ಡಿಯರ್ ಸೈಟೇಶನ್, ವಿವಿಧ ಜಾಗತಿಕ ನಾಯಕರು ನಿರ್ಮಿಸಿದ ವಾಣಿಜ್ಯ ಜೆಟ್‌ಗಳು, ಬೆಲ್ ಹೆಲಿಕಾಫ್ಟರ್‌ಗಳು, ಡ್ರಾಗನ್‌ಫ್ಲೈ, ಸೆಸ್ನಾಸ್, ಭಾರತೀಯ ನಿರ್ಮಾಣದ ಪುಷ್ಪಕ್ ಮತ್ತು ಭಾರತೀಯ ಸಂಸ್ಥೆ ಹಿದಾವಿಯಾದ ರಶ್ಯಾ ನಿರ್ಮಾಣದ ಪ್ರಾದೇಶಿಕ ವಿಮಾನ ಐಎಲ್-114 ವಿಮಾನಗಳು ಪ್ರದರ್ಶನದಲ್ಲಿ ಪಾಲ್ಗೊಳ್ಳುತ್ತಿವೆ.
ಪ್ರದರ್ಶನದಲ್ಲಿ ಅಮೆರಿಕವು ಪಾಲುದಾರ ರಾಷ್ಟ್ರವಾಗಿದ್ದು, ಅಲ್ಲಿನ ಪ್ರಮುಖ ವಿಮಾನ ಕಂಪೆನಿಗಳು ಮತ್ತು ಅಧಿಕಾರಿಗಳು ಈ ಕಾರ್ಯಕ್ರಮದಲ್ಲಿ ಭಾಗವಹಿಸಲಿದ್ದಾರೆ.
ನಾಗರಿಕ ವಾಯುಯಾನ ಸಚಿವಾಲಯ ಮತ್ತು ಎಫ್ಐಸಿಸಿಐ ಈ ವೈಮಾನಿಕ ಪ್ರದರ್ಶನವನ್ನು ಆಯೋಜಿಸಿದೆ. 18 ರಾಷ್ಟ್ರಗಳ ಸುಮಾರು 150 ಪ್ರದರ್ಶನಕಾರರ ಭಾಗವಹಿಸುವಿಕೆ ದೃಢಪಟ್ಟಿದೆ. | 
ಸಲಹೆ/ಪ್ರತಿಕ್ರಿಯೆ
ಮಿತ್ರನಿಗೆ ಕಳುಹಿಸಿ
ಈ ಪುಟ ಮುದ್ರಿಸಿ