ಸಿಟ್ಟಿಗೆದ್ದ ಉಮಾಭಾರತಿ ತನ್ನ ಪಕ್ಷದ ಕಾರ್ಯಕರ್ತನೊಬ್ಬನಿಗೆ ಸಾರ್ವಜನಿಕವಾಗಿ ಥಳಿಸಿರುವುದು ಅವರಿಗೆ ತುಂಬಾ ದುಬಾರಿಯಾಗುವ ಲಕ್ಷಣಗಳು ಗೋಚರಿಸುತ್ತಿವೆ. ಈ ಪ್ರಕರಣದ ಹಿನ್ನೆಲೆಯಲ್ಲಿ ಪಕ್ಷದ 350 ಮಂದಿ ಸಾಮೂಹಿಕ ರಾಜೀನಾಮೆ ಸಲ್ಲಸಿದ್ದಾರೆ. ಭಾರತೀಯ ಜನಶಕ್ತಿ ಪಕ್ಷದ ಸಂಸ್ಥಾಪಕಿ, ರಾಷ್ಟ್ರಾಧ್ಯಕ್ಷೆ ಉಮಾಭಾರತಿ ಅವರು ಬುಧವಾರ ಮಧ್ಯಪ್ರದೇಶದ ಚಿಂದ್ವಾರ ಜಿಲ್ಲೆಯಲ್ಲಿ, ಪಕ್ಷದ ಚಿಂದ್ವಾರ ಜಿಲ್ಲಾ ಪ್ರಧಾನ ಕಾರ್ಯದರ್ಶಿ ಅನಿಲ್ ರಾಯ್ ಎಂಬವರಿಗೆ ಸಾರ್ವಜನಿಕವಾಗಿ ಥಳಿಸಿದ್ದರು. ತಾನು ಪಕ್ಷದ ಮುಖಂಡರೊಂದಿಗೆ ಮಾತುಕತೆ ನಡೆಸುತ್ತಿರಬೇಕಿದ್ದರೆ, ಸಭೆಯಿಂದ ಹೊರಬನ್ನಿರೆಂದು ರಾಯ್ ಪದೇಪದೇ ಮೊಬೈಲ್ ಕರೆ ನೀಡಿರುವುದು ಉಮಾಭಾರತಿ ಕೋಪಗೊಳ್ಳುವಂತೆ ಮಾಡಿತ್ತು. ಹೊರಬಂದ ಉಮಾ ಕಾರಲ್ಲಿ ಕುಳಿತಿದ್ದ ಅನಿಲ್ ಅವರನ್ನು ಕೆಳಗಿಳಿಯುವಂತೆ ಹೇಳಿ ಎರಡೂ ಕೆನ್ನೆಗೆ ಬಾರಿಸಿದ್ದರು.ಅದಾದ ಬಳಿಕ ಪತ್ರಿಕಾಗೋಷ್ಠಿ ಕರೆದು ಅನಿಲ್ ತನ್ನ ತಮ್ಮನನಂತೆ ಆತನನ್ನು ದಂಡಿಸುವ ಮತ್ತು ಮುದ್ದಿಸುವ ಹಕ್ಕು ತನಗಿದೆ ಎಂದು ಹೇಳಿದ್ದರು. ಪ್ರತಿಯಾಗಿ ಅನಿಲ್ ಅವರೂ, ಉಮಾ ತನ್ನ ಹಿರಿಯಕ್ಕನಂತೆ ಎಂದು ಹೇಳಿದ್ದರೂ, ಬುಧವಾರ ಸಂಜೆ ರಾಜೀನಾಮೆ ನೀಡಿದ್ದರು. ಇದಲ್ಲದೆ ಉಮಾರ ಲಿಖಿತವಾಗಿಯೂ ಕ್ಷಮೆಯಾಚಿಸಿದ್ದರು.ಈ ಎಲ್ಲ ಬೆಳವಣಿಗೆಗಳ ಹಿನ್ನೆಲೆಯಲ್ಲಿ ಚಿಂದ್ವಾರ ಜಿಲ್ಲಾಧ್ಯಕ್ಷ ನೇಮಿ ಚಂದ್ ವರ್ಮಾ ಅವರು ಇತರ 350 ಕಾರ್ಯಕರ್ತರೊಂದಿಗೆ ರಾಜೀನಾಮೆ ಸಲ್ಲಿಸಿದ್ದಾರೆ. ರಾಜೀನಾಮೆ ನೀಡಿದವರಲ್ಲಿ ಸಂಜಯ್ ಕೊನಾರ್, ಕಿಶೋರ್ ಮುಂಜಾರೆ ಮತ್ತು ಓಂ ಕುಮಾರಿ ಅವರುಗಳು ಸೇರಿದ್ದಾರೆ. |
|
ಸಲಹೆ/ಪ್ರತಿಕ್ರಿಯೆ
ಮಿತ್ರನಿಗೆ ಕಳುಹಿಸಿ
ಈ ಪುಟ ಮುದ್ರಿಸಿ
