ಸೂಕ್ತ ಕಾರ್ಯಕ್ಷಮತೆ ತೋರದ ಸರಕಾರಿ ಸಿಬ್ಬಂದಿಗಳಿಗೆ ಇನ್ನು ಮುಂದೆ ಗ್ರಹಚಾರ ಕಾದಿದೆ.ಇನ್ನುಮುಂದೆ ಸರಕಾರಿ ನೌಕರರು ತಮ್ಮ ಮೇಲಧಿಕಾರಿಗಳ ನಿರೀಕ್ಷೆಗೆ ತಕ್ಕಂತೆ ಕಾರ್ಯನಿರ್ವಹಿಸದಿದ್ದಲ್ಲಿ, ತಮ್ಮ ಸೇವೆಯ 20 ವರ್ಷಗಳ ಬಳಿಕ ಉದ್ಯೋಗವನ್ನು ಕಳೆದುಕೊಳ್ಳುವ ಅಪಾಯಕ್ಕೀಡಾಗಬೇಕಾಗಬಹುದು.ವೀರಪ್ಪ ಮೊಯ್ಲಿ ನೇತೃತ್ವದ ಆಡಳಿತ ಸುಧಾರಣಾ ಸಮಿತಿಯು, ಸರಕಾರಿ ನೌಕರರ ಸೇವಾ ನಿಯಮಗಳಲ್ಲಿ ಬದಲಾವಣೆಗೆ ಶಿಫಾರಸ್ಸು ಮಾಡಿದ್ದು, ನಾಗರಿಕ ಸೇವಕರು ಹೆಚ್ಚು ಉತ್ತರದಾಯಿಯಾಗುವಂತೆ ಮಾಡಲು ಎರಡು ತೀವ್ರ ಪರಾಮರ್ಷೆಯ ಸಲಹೆ ನೀಡಿದೆ.ಮೊದಲ ಪರಾಮರ್ಷೆಯನ್ನು ನೌಕರನೊಬ್ಬನ ಸೇವೆಯ 14 ವರ್ಷದಲ್ಲಿ ನಡೆಸಲಾಗುವುದು. ಈ ವೇಳೆಯಲ್ಲಿ ನೌಕರರ ಸಾಮರ್ಥ್ಯ ಮತ್ತು ಬಲಹೀನತೆಗಳ ಕುರಿತು ತಿಳಿಸಲಾಗುವುದು. ಎರಡನೆ ಪರಾಮರ್ಷೆಯು 20 ವರ್ಷಗಳ ಬಳಿಕ ನಡೆಯಲಿದ್ದು ಅಧಿಕಾರಿ ಸೇವೆಯಲ್ಲಿ ಮುಂದುವರಿಯಲು ಅರ್ಹನೆ ಎಂಬುದನ್ನು ನಿರ್ಧರಿಸಲಾಗುವುದು. ಇಪ್ಪತ್ತು ವರ್ಷಗಳ ಪರಾಮರ್ಷೆಯ ವೇಳೆ ಸರಕಾರಿ ಅಧಿಕಾರಿಗಳು ಅಯೋಗ್ಯರೆಂದು ಕಂಡು ಬಂದಲ್ಲಿ ಅವರನ್ನು ಮನೆಗೆ ಕಳುಹಿಸಲಾಗುವುದು. ಈ ಕುರಿತು ಪ್ರಸ್ತಾಪಿತ ನಾಗರಿಕ ಸೇವೆಗಳ ನಿಯಮದಲ್ಲಿ ನಿಬಂಧನೆಯೊಂದನ್ನು ಮಾಡಲಾಗುವುದು ಎಂದು ಆಯೋಗವು ಶುಕ್ರವಾರ ಬಿಡುಗಡೆ ಮಾಡಿರುವ ಇತ್ತೀಚಿನ ವರದಿಯಲ್ಲಿ ಹೇಳಲಾಗಿದೆ.ಇನ್ನು ಮುಂದಿನ ಹೊಸ ನೇಮಕಾತಿಗಳ ವೇಳೆ, ನೇಮಕಾತಿಯ ಅವಧಿ 20 ವರ್ಷಗಳು, ಮತ್ತು ಬಳಿಕ ಅದರ ವಿಸ್ತರಣೆಯು ಸಿಬ್ಬಂದಿಯ ಪರಾಮರ್ಷೆಯ ಫಲಿತಾಂಶದ ಆಧರಾದ ಮೇಲೆ ಅವಲಂಬಿತವಾಗಿದೆ ಎಂದು ಸ್ಪಷ್ಟವಾಗಿ ಹೇಳಲಾಗುವುದು ಎಂಬುದಾಗಿ ಸಮಿತಿಯ 377 ಪುಟಗಳ ವರದಿ ತಿಳಿಸಿದೆ. |
ಸಲಹೆ/ಪ್ರತಿಕ್ರಿಯೆ
ಮಿತ್ರನಿಗೆ ಕಳುಹಿಸಿ
ಈ ಪುಟ ಮುದ್ರಿಸಿ
